9.09c
Երեվան
չրք, սպտ 09
Գյումրիի ԳՈՀԱՐ երգչախմբի եւ սիմֆոնիկ նվագախմբի անդամներին բեյրության ելույթներից հետո ընդունել է Մեծի Տանն Կիլիկիո կաթողիկոս Արամ Ա-ն: ԳՈՀԱՐ խմբի շուրջ 200 անդամներն Անթիլիաս են այցելել խմբի հիմնադիր, արվեստի մեկենաս Գոհար Խաչատուրյանի եւ նրա երեք որդների` Հարութ, Շահե եւ Նար Խաչատուրյանների, ինչպես նաեւ` Լիբանանի խորհրդարանի հայ պատգամավորների հետ:
Արամ Ա-ն բարձր է գնահատել հայ երաժշտությանն ու արվեստին սատար կանգնելու` Խաչատուրյան ընտանիքի անմնացորդ նվիրումը եւ Մեծի Տանն Կիլիկիո Կաթողիկոսության «Ս. Մեսրոպ Մաշտոց» շքանշանով պարգեւատրել է Գոհար Խաչատուրյանին, ում հովանավորությամբ 1997 թվականից ի վեր Գյումրիում գործում են երաժշտական դպրոց, հայկական ամենամեծ երաժշտախումբն ու իրականացվում են հարյուրավոր աշխատատեղեր ապահովող այլ ծրագրեր:
ԳՈՀԱՐ-ի չորս համերգները Բեյրութում ընթացել են լեփ-լեցուն դահլիճներում: Նվագախումբն ու երգչախումբը Ցեղասպանության զոհերի հիշատակի ոգեկոչումն ու Եղեռնից հետո հայ ժողովրդի վերածնունդը նշանավորել են բացառիկ համերգներով` կատարելով 100 երգ:
