Թուրքիա- («Տէյլի Սապահ»- Պոլիս) Թուրք փոփ երգիչ մը փրկուած է վիրաւորուելէ, երբ իր ինքնաշարժին վրայ կրակ բացուած է Պոլսոյ մէջ: Պէրգայ Շահին, որ համեմատաբար նոր աստղ կը համարուի թրքական երաժշտական շրջանակներուն մէջ, Պէշիկթաշ թաղամասին մէջ մահափորձէ փրկուած է, երբ երկու անհատներ կրակ բացած են անոր ինքնաշարժին ուղղութեամբ: Երգիչը՝ «Ոսկի թիթեռնիկ» հեռատեսիլային մրցանակի արժանացած է 2011-ին լաւագոյն արուեստագէտի կոչում ստանալով: Ըստ ոստիկանութեան` 34-ամեայ կատարողը ըսած է, որ ինք չի գիտեր թէ, ով կրնայ ըլլալ յարձակողը: Աւելի ետք, դատական պաշտօնեաները դէպքի վայր եկած են քննելու ինքնաշարժն ու պատահարը: Բացուած է հետաքննութիւն: