4.09c
Երեվան
ուրբ, նմբ 22
Անցնող ժամերուն Սուրիոյ «չափաւորական» ճանչցուած ըննդիմութեան մէկէ աւելի ներկայացուցիչներ կը խօսին արդիական զէնքեր ստանալու մասին: Այս յայտարարութեանց ամէնէն ուշագրաւը ընդդիմադիրներու խօսնակներէն համարուող Րիատ Հըճէպի ըրած յայտարարութիւնն է, ուր ան կը խօսէր ընդդիմադիր զինեալներուն արդիական զէնքեր տրամադրելուն մասին: Գետնի վրայ կատարուող որոշ փոփոխութիւններ նաեւ կը խօսին այն մասին, որ ընդդիմութիւնը միաւորուելով կը պատրաստուի իր տիրապետութեան տակ առնել Մարէհ եւ Մընպէժ շրջանները, որոնք կը համարուին Սուրիա- Թուրքիա սահմանին վերջին հիմնական գաւառները: Ընդդիմութիւնը, որ պարզած է Տահէշին դէմ պայքարելու դրօշակը, ծրագիր ունի հարուածել թրքական սահմանին եղած քրտական ջոկատներու կեդրոնատեղիները, այդպիսով «ժէսթ» մը ընելով Անգարայի տէրերուն: Այս հին-նոր ծրագիրը ըստ երեւոյթին պիտի փոխարինէ Էրտողանի կողմէ կարեւոր համարուած ապահովական գօտի մը ստեղծելու ծրագիրը: Պատկերին դիմաց հիմնական հարցադրումը կը մնայ՝ արդեօ՞ք Թուրքիոյ սահմանին վրայ եղած քիւրտ զինեալ խմբաւորումները տեղի պիտի տան Անգարայի եւ Րիատի հրամաններով առաջնորդուող ընդդիմադիրներուն դիմաց: Յառաջիկայ օրերը պիտի պատասխանեն այս հարցումին:
