0.09c
Երեվան
հնգ, դկտ 12
Սուրիոյ մայրաքաղաք Դամասկոսը յայտնուած է ընդդիմադիրներու վերահսկողութեան տակ՝ սուրիական քանի մը խոշոր քաղաքներու գրաւումէն երկու շաբաթէն ալ քիչ ժամանակամիջոցին, յայտնած է BBC-ին։
Տեղի ժամանակով 6:00-ին զինեալները յայտնած են, որ մտած են Դամասկոս, գրաւած քաղաքի մերձակայքը գտնուող «Սէյտնաիա» բանտը եւ ազատած բանտարկեալները: Անոնք այդ անուանած էին «անարդարութեան շրջանի աւարտ»:
Սուրիոյ մէջ 2011 թուականին սկսած պատերազմի ընթացքին այդ բանտին մէջ կը պահուէին նախագահ Ասատի ռեժիմի հակառակորդները: Իրաւապաշտպանները յայտարարած էին, որ պատերազմի առաջին 5 տարիներուն այդտեղ գաղտնի պայմաններու մէջ մահապատիժի ենթարկուած է 5-13 հազար մարդ:
CNN-ը, վկայակոչելով ընդդիմադիր զինեալներու յայտարարութիւնը, յայտնած է, որ անոնք «կը պատրաստուին վերահսկողութիւն սահմանել ռատիոյի ու հեռուստատեսութեան շէնքերու նկատմամբ, որ հեռարձակեն Ասատի նկատմամբ յաղթանակի մասին յայտարարութիւնը»:
Դամասկոսի մէջ տեղի ունեցող իրադարձութիւններու մասին միակ պաշտօնական մեկնաբանութիւնը տուած է Սուրիոյ վարչապետ Մուհամմատ Ղազի ալ-Ճալալին: Ան յայտարարած է, որ կը գտնուի իր տան մէջ ու պատրաստ է աջակցելու երկրի կառավարման «փոխանցման» այն բանէ ետք, երբ Սուրիոյ նախագահը հեռացած է երկրէն:
Ալ-Ճալալին յայտարարած է, որ պատրաստ է համագործակցելու որեւէ ղեկավարութեան հետ, որուն կ՚ընտրէ Սուրիոյ ժողովուրդը:
Ի պատասխան՝ զինեալներու առաջնորդը յայտարարած է AFP գործակալութեան, որ Դամասկոսի պետական հաստատութիւնները պիտի մնան Սուրիոյ վարչապետի ղեկավարման ներքոյ մինչեւ իշխանութեան պաշտօնական փոխանցումը:
Դեռ յայտնի չէ Պաշշար Ասատի գտնուելու յստակ վայրը:
Աւելի վաղ յայտնած էինք, որ Ասատ լքած է մայրաքաղաք Դամասկոսը ու հեռացած «անյայտ ուղղութեամբ»:
New York Times-ը գրած է, որ միակ թռիչքը, որ տեղի ունեցած է Դամասկոսի միջազգային օդակայանէն, եղած է Մոսկուայի ուղղութեամբ:
Դամասկոսի տասնեակ բնակիչներ նոյնպէս փորձած են լքել երկիրը, սակայն օդակայանին մէջ քաոս տիրած է, յայտնած է CNN-ը:
Ռուսական «ՌԻԱ Նովոսթի»ն, յղում կատարելով Սուրիոյ ռատիոյին, յայտնած է, որ բոլոր աշխատակիցները լքած են օդակայանը, ատոր գործունեութիւնն ամբողջութեամբ կասեցուած է:
Մինչ այդ, Դամասկոսի որոշ բնակիչներ սկսած են հաւաքուիլ մայրաքաղաքի կեդրոնական հրապարակին մէջ՝ տօնելու Պաշշար Ասատի ռեժիմի տապալումը:
