22.09c
Երեվան
կրկ, սպտ 01
ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը սեպտեմբերի 8-ին Պորտուգալիայի խորհրդարանի հրավերով Լիսաբոնում մասնակցում է ԵԽԽՎ նախաձեռնությամբ կազմակերպված կոնֆերանսին, որտեղ և հանդես է եկել ելույթով՝ Սփյուռքի հետ կապված քաղաքականության շրջանակում խորհրդարանական փոխգործակցության մեխանիզմների շուրջ:
Անդրադառնալով Սփյուռքի հետ կապված պետական քաղաքականության առաջնահերթություններին՝ արտաքին հարաբերությունների հանձնաժողովի նախագահը ներկայացրել է ոլորտում առկա հիմնական գործընթացները, կատարված աշխատանքները, համագործակցության հիմնական մեխանիզմները, կարևորել Հայրենիք-Սփյուռք արդյունավետ փոխգործակցային հասարակության ձևավորման և զարգացման դերն ու նշանակությունը, այս համատեքստում՝ Սփյուռքի հետ կայուն և արդյունավետ համագործակցային հարթակների ստեղծումը:
Իր ելույթում Արմեն Աշոտյանն ընդգծել է Սփյուռքի հետ գործակցության ոլորտում ինքնակազմակերպման ռեալ և գործուն մեխանիզմների ներդրման և իրականացման կարևորությունը, Սփյուռքի հետ տարվող աշխատանքներում գլոբալ հարթակի ստեղծման դերը՝ նորարարական կրթական ցանցերի, տնտեսական շուկաների, սոցիալական և քաղաքական նախապայմանների առկայությամբ պայմանավորված, ինչպես նաև նշված ոլորտներում փոխգործակցության արդյունավետության բարձրացման համար արդյունավետ մեխանիզմների ներդրման նշանակությունը: Այս համատեքստում անդրադարձ է կատարվել նաև Հայաստանի Հանրապետության և Սփյուռքի միջև առկա փորձին ու իրականացված ծրագրերին:
Արմեն Աշոտյանը Սփյուռքի հետ հարաբերությունների կառուցման գործում, գլոբալ տրանսֆորմացիոն գործընթացների համատեքստում կարևորել է նաև ցանցային համագործակցության ձևավորումը՝ ներառյալ խորհրդարանական համագործակցության արդյունավետ հարթակի ստեղծումը:
Իր ելույթում Արմեն Աշոտյանը նաև կոչով դիմել է ԵԽԽՎ պատգամավորներին՝ իրենց պետություններում, ինչպես նաև ԵԽԽՎ մակարդակում հետամուտ լինելու ադրբեջանական կոռուպցիոն սկանդալի շուրջ լիարժեք հետաքննության անցկացմանը՝ այդ կառույցի ժողովրդավարական համբավն ու հեղինակությունը վերականգնելու համար:
