21.09c
Երեվան
կրկ, մրտ 30
Փարիզի նշանաւոր Սէն-Ռոք եկեղեցւոյ մէջ, օրերս, յատուկ համերգով մը նշուած է «Սիփան Կոմիտաս երգչախումբ»ի հարիւրամեակի, որ նաեւ յարգանքի տուրք էր մայէսթրօ Կարպիս Ափրիկեանին՝ երգչախումբի նախկին ղեկավարին, որ մահացած է 2024ին։ Ան առաւել քան 50 երկար տարիներ ղեկավարած էր երգչախումբը:
Այս մասին «Արեւելք» տեղեկութիւն քաղեց Լոս Անճելըս հրապարակուող՝ «Ասպարէզ»էն, որ, մասնաւորապէս, գրած է՝
«Սիփան Կոմիտաս երգչախումբի հարիւրամեակի համերգը տեղի ունեցաւ Ուրբաթ, 14 Մարտին, Փարիզի նշանաւոր Սէն-Ռոք եկեղեցւոյ մէջ: Այս ձեռնարկը յարգանքի տուրք մատուցեց մայէսթրօ Կարպիս Ափրիկեանին՝ երգչախումբի նախկին ղեկավարին, որ մահացաւ 2024ին։ Ան առաւել քան 50 երկար տարիներ ղեկավարած էր երգչախումբը:
Դեկտեմբեր 2023էն ի վեր, երգչախումբին երաժշտական եւ գեղարուեստական ղեկավարութիւնը ստանձնած է երաժշտահան, ջութակահար եւ խմբավար Դաւիթ Փիվազեան, որ ծնած է 1993ին, Երեւան:
Շատ հարուստ եւ մեծապէս որակաւոր համերգի ծրագիրը բաղկացած էր հայկական ծիսական եւ աւանդական երգերու խառնուրդէ մը՝ գլխաւորաբար Կոմիտասի եւ Ափրիկեանի գործերը ներառող:
Յայտագիրի առաջին մասով, մեծ հաճոյքով ունկնդրեցինք. «Օրհներգ Կաթողիկոսին», «Սիրտ Իմ Սասանի», «Տէր Ողորմեա՛», «Կռունկ», «Տլէ Եաման», «Գարուն ա», «Երկնից-գետնից» «Ել, Ել», «Չինար Ես», «Ալագեազ» եւ «Խնկի Ծառ»՝ Կոմիտասէն, «Նոր Ծաղիկ»՝ Ներսէս Շնորհալիէն:
Իսկ երկրորդ մասով ներկայ եղանք «Սիփան-Կոմիտաս» երգչախումբի բարձրագոյն որակի ելոյթին, ի յիշատակ իր առասպելական ղեկավարին՝ Կարպիս Ափրիկեանի:
Նախ, UniArt լարային քառեակը (գեղարուեստական ղեկավար՝ Մարիա Քրիսթիանի), ընկերակցութեամբ մեներգիչներ Աննա Քասեանի, Ատամ Պարոյի, Արտաւազդ Սարգսեանի եւ դաշնակահարուհի Էլիզապէթ Քալֆօղլուի, մեզի հրամցուց «Ալ Այլուղս», «Քելէ Քելէ» եւ «Վաղարշապատի Պարը»՝ Կոմիտասէն, «Գիշերային»՝ Է. Պաղտասարեանէն, Մարիա Քրիսթիանիի ջութակի մենանուագով:
Ապա, երգչախումբը կատարեց հետեւեալները՝ փոքր հարսանեկան շարք. «Օրօր» (մեներգիչ Աննա Քասեան, սոփրանօ) «Գիշերային Լուսնակ Անոյշ» եւ «Մութն Էր»՝ Կարպիս Ափրիկեանէն, «Կարմիր Ծաղիկ Մը Գարունի»՝ Միսաք Մեծարենց / Ռոբերտ Ամիրխանեանէն եւ «Գթա՛ Տէր«՝ Ա. Յարութիւնեանէն:
Վերջապէս, իբրեւ պսակումը երեկոյթին՝ համերգը աւարտեցաւ Երեւանի քայլերգով՝ «Երեւան Էրեբունի»-ով (Է. Յովհաննիսեանի, Պարոյր Սեւակի խօսքերով), որ ընդունուած էր 2004ին՝ նշելու համար քաղաքի 2750րդ տարեդարձը:
Մեծ թիւով հանդիսականները այս վերջին գործը երգեցին երգչախումբին հետ եւ երկար վայրկեաններ յոտնկայս ծափահարեցին:
Այս համերգը անգամ մը եւս լուսարձակի տակ բերաւ հայկական երաժշտութեան հարստութիւնը:
