-3.91c
Երեվան
ուրբ, նմբ 28
Յանուն հայրենիքի կեանքը զոհած մերօրեայ հերոսները պէտք է ճանչնալ անուն առ անուն. Կիմ Խաչատրեանը, Երեւանի Պետական Բժշկական Համալսարանի (ԵՊԲՀ) ատամնաբուժական ֆակուլտետի ուսանող էր: Այս մասին դիմատետրի իր էջին վրայ գրած է ԵՊԲՀ-ի ռեկտոր՝ Արմէն Մուրատեան:
Ան, մասնաւորապէս, նշած է. «Մերօրեայ հերոսի կողմից հնչեցուած խօսքերն ընկերները նրա մահից յետոյ յաճախ են կրկնում՝ աւելի զգալով դրանց խորութիւնը. «Բախտը մէկն է զինուորի՝ կամ մահ, կամ ազատութիւն»:
«Շատ դժուար է Կիմի մասին խօսել անցեալով։ Մեր Կիմը իւրայատուկ, մեծատառով մարդ էր։ Իր պէս հայրենասէր, բարի, անկեղծ, պարզ ու արդար մարդիկ քիչ են»,- կը պատմէ դասարանակից՝ Մանոն Գէորգեանը՝ շարունակելով, որ Կիմը իւրայատուկ արժեհամակարգի տէր էր, ազգային արժէքներուն ու գաղափարներուն նուիրուած։
Այդ գաղափարներուն ալ հաւատարիմ մնալով 12 հոկտեմբերին ՀՅԴ «Նիկոլ Աղբալեան» ուսանողական միութեան իր ընկերներուն հետ մեկնեցաւ ռազմաճակատ։
«Մեկնեցին բոլորով, բայց վերադարձան առանց Կիմի»,-ընդգծած է ԵՊԲՀ-ի ուսանողը։
Ատամնաբուժական ֆակուլտետի ուսանողը բացի որ հայրենաասէր էր, նաեւ շատ ընկերասէր էր, յաճախ ամբողջ խումբին հրաւիրած էր իր ծննդավայր Արենի՝ գինի խմելու եւ տեսարժան վայրերը տեսնելու։
Դասարանակիցները Կիմի հրաւէրը անպատասխան պիտի չձգեն։ Խումբով, չնայած որ արդէն աւարտած են, որոշած են ու խոստացած, որ պիտի երթան Արենի՝ Կիմի յիշատակին համար գինի խմելու։
«Մեր Կիմը լուսաւոր էր։ Երբեք չեմ մոռանայ, թէ ինչպէս էր դասի ընթացքում երգում Գետաշէնը, իրեն բնորոշ ռազմահայրենասիրական ոգով։ Շատ լաւ կատակի զգացում ունէր, յիշում եմ՝ ինչպէս մի անգամ առանց գլխարկի պատիւ տուեց, մենք էլ ասեցինք, որ դատարկ գլխին պատիւ չեն տալիս, ինչին Կիմը պատասխանեց «ինչի է դատարկ՝ մէջը լիքը խելք կայ»»,- կը յիշէ Մանոնը։
Ան վստահ է, որ աւելի բան ըսել պէտք չէ. լուսանկարներուն նայելով շատ բան կարելի է նկատել հերոսի աչքերուն եւ հայեացքին մէջ։
Երիտասարդ մարտիկը ծնած էր 17 մարտ, 1995-ին, Վայոց Ձորի մարզի Արենի գիւղը: 2001-2012 թուականներուն յաճախած է Արենիի միջնակարգ դպրոցը։ 2013-2015 թուականներուն ծառայած է ՀՀ զինուած ուժերէն ներս (Մեղրի)։ Նպատակ ունէր ուսումը աւարտելէն յետոյ մասնագիտական գործունէութիւն ծաւալել հայրենի գիւղը, հիմնելով ատամնաբուժարան։
Կիմ Խաչատրեան տեւական ժամանակ եղած է առաջնագիծ, նահատակուած է 31 հոկտեմբերին:
