-1.91c
Երեվան
կրկ, նմբ 10
Սուրիա- «Ժողովուրդը տարբեր միջոցներ գտած է դիմադրելու ջուրի եւ ելեկտրականութեան տագնապներուն»,- «Արեւելք»ին ըսաւ հալէպահայ հրապարակախօս Լեւոն Շառոյեան: Շառոյեան դիտել տուաւ, որ ներկայ պահու դրութեամբ ջուրի եւ ելեկտրականութեան տագնապները առկայ են եւ վերջին օրերուն ջրամատակարարումն ու ելեկտրական հոսանքի հայթայթումը դարձեալ խափանուած են: Ան յոյս յայտնեց, որ յառաջիկայ օրերուն Հալէպ վերստին ջուր եւ ելեկտրականութիւն պիտի ունենայ: Շառոյեան, խօսելով ջուրի տագնապին դիմադրելու ձեւերուն մասին, ըսաւ. «Ժողովուրդը տուներու մէջ ջուր կը հաւաքէ` այդպիսով տագնապին դէմ դնելու համար: Իսկ ելեկտրականութեան պարագային մարդիկ իրենց տուներուն մէջ բարդ (Batterie) դրած են եւ այդ միջոցաւ կրնան կեանքը աւելի տանելի դարձնել»: Ըստ Շառոյեանի, այս բոլորը գործի կը դրուին նիւթական մեծ զոհողութիւններու գնով: Խօսելով հալէպահայութեան իրավիճակին մասին` Շառոյեան նկատել տուաւ, որ գաղութի թիւը բաւական նօսրացած է եւ գաղութին 50 առ 100-ն արդէն կը գտնուի Հալէպէն դուրս: Ըստ Շառոյեանի, հակառակ Հալէպէն հեռացողներու մեծ թիւերուն, համայնքին մէջ կայ զանգուած մը, որ կառչած կը մնայ գաղութին եւ իր կարծիքով այդ զանգուածն է, որ վառ կը պահէ Հալէպը: «Ժողովուրդի հատուած մը կայ, որ կառչած կը մնայ Հալէպին , այլապէս մինչեւ հիմա մեր բոլոր եկեղեցիներն ու ակումբները փակուած պիտի ըլլային»,- ըսաւ Շառոյեան, մատնանշելով, օրինակ տալով անցնող Յունիսին Բարեգործական միութեան կազմակերպած երիտասարդ գրող Նուպար Նալպանտեանի (18 տարեկան) բանաստեղծական հատորին գինեձոն- երեկոն, ուր, ըստ Շառոյեանի սրահը եղած է աննախընթաց կերպով բազմամարդ եւ այս մէկը դարձեալ մեծագոյն ապացոյցն է, որ Հալէպը տակաւին կը շնչէ ու կ'ապրի: Ըստ Շառոյեանի, Հալէպէն հեռացողներուն կէսէն աւելին հաստատուած է Երեւան , ապա Պէյրութ, Թուրքիա եւ այլ տեղեր: Ան այս առումով յոյս յայտնեց, որ Երեւան փոխադրուած հալէպահայերը իրենց համար ընկերային եւ տնտեսական բարւոք պայմաններ կը գտնեն եւ հեռու ափեր չեն երթար ու կը մնան Երեւանի մէջ` այդպիսով հեռու մնալով ձուլման համայնակուլ պայմաններէն: Յիշեցնենք, որ Լեւոն Շառոյեան հալէպահայ հրապարակախօս է: Ան երկար տարիներ աշխատակցութիւն բերած է Փարիզի «Յառաջ»ին եւ Պոլսոյ «Մարմարա»ին»:
