5.09c
Երեվան
շբթ, դկտ 21
Սա ամէնէն կարեւոր հարցերէն մէկը չէ, բայց քանի որ հարցը հնչեր է, կը պատասխանեմ։ Այս մասին այսօր Մայր Տաճարին մէջ հրաւիրուած ասուլիսին ըսած է Գերաշնորհ Տէր Արշակ արքեպիսկոպոս Խաչատրեանը՝ պատասխանելով հարցին՝ արդեօք իշխանութիւնները հրաւիրած են Մայր Տաճարի վերաօծման արարողութեան:
«Մենք հրաւէրներ ուղղել ենք բարձրաստիճան պաշտօնեաներին, այս պահի դրութեամբ իրենց մասնակցութեան վերաբերեալ սպառիչ պատասխաններ չունենք: Միայն Ազգային Ժողովի նախագահի կողմից է սպառիչ պատասխան տրուել, որ չի մասնակցելու», -ըսած է Արշակ արքեպիսկոպոսը:
Հարցին՝ ինչո՞ւ հրաւիրած են, ան արձագանգած է. «Անկեղծ ասեմ՝ մեզ մօտ էլ կային տարակոյսներ իշխանութիւններին հրաւիրել-չհրաւիրելու հետ կապուած՝ պայմանաւորուած եկեղեցու եւ իշխանութիւնների յարաբերութիւնների ներկայ բնութով:
Հաշուի առնելով հենց այդ հանգամանքը՝ իշխանութիւններին հրաւիրելու նպատակայարմարութեան խնդիրը քննարկուել է եկեղեցում ամենաբարձր մակարդակով՝ Գերագոյն հոգեւոր խորհրդի ժողովում: Գերագոյն հոգեւոր խորհրդի ժողովը վերջնական որոշման է եկել, որ այո՛, պէտք է հրաւէրներն ուղղել»:
Ինչ կը վերաբերի անոր, թէ ինչպէ՞ս կ՚ըլլայ, որ ե՛ւ հրաժարական կը պահանջեն, ե՛ւ հրաւէր կ՚ուղղեն, Արշակ արքեպիսկոպոսն ըսած է, որ այդ հարցերը շատ յստակ պէտք է տարանջատել:
«Միջոցառումներին, համազգային արարողութիւններին իշխանութիւններին հրաւիրելը բացարձակապէս չպէտք է մեկնաբանել այն իմաստով, որ եկեղեցին հրաժարուել է իր դիրքորոշումներից եւ եկեղեցին ամբողջական լոյալութիւն է դրսեւորում այն քաղաքական գծի նկատմամբ, որը որդեգրուած է իշխանութիւնների կողմից: Եկեղեցին շարունակելու է իր դիրքորոշումները, իր մտահոգութիւններն արտայայտել բոլոր այն դէպքերում, երբ դրա անհրաժեշտութիւնը կը գտնի», - նշած է ան:
