15.09c
Երեվան
կրկ, մյս 03
«Ժողովուրդ» օրաթերթը կը գրէ. « «Ժողովուրդ» օրաթերթը դեռեւս 20 օր առաջ ահազանգել էր, որ «Արցախն անկլաւ դառնալու» վտանգի առաջ կարող է կանգնել: Այսօր, ցաւօք, մեր տեղեկութիւններն իրականութիւն են դարձել, ու Արցախի մեր՝ աւելի քան 120 հազար քաղաքացիներն արդէն չրրորդ օրն անընդմէջ ոչ միայն շրջափակման մէջ են գտնւում, այլեւ հումանիտար աղէտի առաջ են կանգնած: Ատրպէյճանը խոչընդոտում է նաեւ կազամատակարարումը, ու Արցախն արդէն 3-րդ օրն է՝ նաեւ կազ չունի:
Բացի այդ, մօտ 20 օր առաջ արդէն Նիկոլ Փաշինեանն իր թիմակիցների հետ Արցախի գլխին կախուած վտանգի մասին ծանր զրոյց էր ունեցել, նրանց մօտ սրտնեղել, թէ այս իրավիճակում Հայաստանը մենակ է մնացել, ու եթէ յանկարծ Ատրպէյճանը որոշի սադրանքի դիմել, յայտնի չէ, թէ ինչ է լինելու:
ՔՊ-ական պատգամաւոր Վիգէն Խաչատրեանին խնդրեցինք մեկնաբանել, թէ մօտ 20 օր առաջ ինչ են զրուցել վարչապետ Փաշինեանի հետ: «Հիմա դժուար մտաբերեմ այդ մանրամասները, բայց Ատրպէյճանի այս պահուածքը սպասելի էր. մենք պէտք է նման իրադարձութիւնների նախապատրաստուած լինենք»,- նշած է ան:
«Մեր հարցը հենց այդ մասին է, որ իմանալով գլխներիս գալիքը՝ իշխանութիւնը կանխող ի՞նչ քայլեր է արել»,- աւելի յստակ ձեւակերպումով դիմեցինք իշխանական պատգամաւորին, ինչին ի պատասխան՝ արձագանգեց. «Դուք ուշադիր հետեւե՞լ էք Հայաստանի պաշտօնատար այրերի ուղեւորութիւններին աշխարհի տարբեր մայրաքաղաքներ ու քաղաքներ: Բա էդ բոլորն ինչի՞ համար են արւում: Նրանք հո զբօսաշրջիկ չե՞ն: Կամ պաշտպանութեան նախարարի, Անվտանգութեան խորհրդի նախագահի՝ տարբեր երկրներ այցերը…»:
Թերեւս իրադարձութիւններն ու գործընթացներն են խօսում եւ վկայում, թէ իրականում «աշխարհի մայրաքաղաքներում» հայ պաշտօնեաներն ինչ են արել, ինչով են զբաղուել. Հայաստանին պատուհասած վտանգնե՞րն են ներկայացրել, թէ՞ զբօսաշրջիկի կարգավիճակով ամենատարբեր «տուրերի» են մասնակցել:
Փաստն այն է, որ արդէն 4-րդն օրն է՝ Արցախի մեր հայրենակիցների գլխին ցեղասպանուելու սուր է կախուած, բայց «աշխարհի մի քանի մայրաքաղաքները», բացի «կոչ անելուց», ուրիշ որեւէ կերպով հաւանական ոճրագործութիւնը չեն էլ փորձում կանխել»:
