-0.91c
Երեվան
ուրբ, դկտ 19
Արցախի խնդիրը մեր ժողովուրդը յուզող ամենակարեւոր հարցն է ու այս առումով, անշուշտ, մեր ժողովուրդի վեաբերմունքը, որ ամէն գնով պէտք է պաշտպանել Արցախի ժողովուրդի ազատ, անկախ ապրելու իրաւունքը։
Այս մասին Մայր Աթոռէն ներս լրագրողների հարցերուն ի պատասխան ըսած է Ամենայն Հայոց Կաթողիկոս Գարեգին Բ-ն։
«Այդ իմաստով բաւարար չափով աշխատանքներ իրականացուել են, լիայոյս ենք, որ այդ ջանքերը պէտք է շարունակուեն ու խնդիրը միջազգային հանրութեան, մեր ժողովրդի ջանքերի արդիւնքում պէտք է ունենայ իր բարւօք կարգաւորումը։ Չենք կարծում, որ նման յայտարարութիւնները տեղին են ու որեւէ կերպով կարող են նպաստաւոր լինել հարցի կարգաւորման համար։ Պէտք է չշտապել, ընդհակառակը, պէտք է ամէն կերպ պաշտպանել Արցախի ժողովրդի ինքնորոշման, անկախ ապրելու աստուածաշնորհ իրաւունքը»:
Հարցին, թէ Դուք կը տեսնէ՞ք հնարաւորութիւն, որ Արցախը կրնայ ըլլալ Ատրպէյճանի կազմին մէջ, Գարեգին Բ-ն պատասխանած է.
«Ես չեմ կարող պատկերացնել, որ Արցախը կարող է լինել Ադրբեջանի կազմում: Դա կը նշանակի հայ ժողովրդի նկատմամբ մի նոր ցեղասպանութիւն, դա կը նշանակի հայաթափում Արցախի մեր ժողովրդի: Մենք ամէն ջանք պէտք է ներդնենք, որ կարողանանք միջազգային նորմերի եւ օրէնքների շրջագծում ապահովել Արցախի մեր ժողովրդի ազատ, անկախ ապրելու իրաւունքը»:
Անդրադառնալով այն հարցին, թէ ինչպէ՞ս կը հակազդէ Եկեղեցին, եթէ իշխանութիւնը որոշէ երթալ խաղաղութեան պայմանագրի կնքման, որով Արցախը կը յայտնուի Ատրպէյճանի կազմին մէջ, կաթողիկոսը պատասխանած է․
«Մենք ներկայացրել ենք մեր վերաբերմունքը Արցախի հիմնախնդրի ու կարգավիճակի վերաբերեալ։ Կարծում եմ մեր ժողովուրդը որեւէ կերպ չի հաշտուի Արցախն Ադրբեջանի կազմում տեսնելու գաղափարի հետ։ Խաղաղութեան պայմանագրի յօդուածներին, կէտերին մենք ծանօթ չենք եւ այդ առնչութեամբ կարծիք չենք կարող յայտնել: Բայց մեզ համար կասկածից վեր է, որ մեր ժողովուրդը ի գին ամէն զոհողութեան պաշտպանելու է Արցախի ժողովրդի ազատ ու անկախ ապրելու իրաւունքը»:
