5.09c
Երեվան
կրկ, դկտ 22
«Հրապարակ» թերթը կը գրէ.
«Երէկուանից մայրաքաղաքում մեկնարկել են զանգուածային անհնազանդութեան գործողութիւնները, որի ընթացքում բազմաթիւ բախումներ եղան ակցիայի մասնակիցների ու ոստիկանական ուժերի միջեւ: Բերման ենթարկուեց շուրջ 200 քաղաքացի: Ոստիկանական գործողութիւնները երբեմն ուղեկցւում էին բռնի ուժի գործադրմամբ, վայրագ դրսեւորումներով:
Հիմնականում յատուկ նշանակութեան ջոկատի տղաներն էին ոտքերով ու ձեռքերով հարուածներ հասցնելով, կոպիտ քաշքշելով` մարդկանց բերման ենթարկում: Բայց սրանք ամբողջ ոստիկանութիւնը չեն: Հակառակը` ոստիկաներից շատերը ոչ միայն բարեկիրթ էին ու ցուցարարների նկատմամբ հնարաւորինս մեղմ, այլ մի բան էլ` նրանց կողմից էին:
Բերման ենթարկուածներից ոմանք մեզ պատմեցին, որ ոստիկաններն իրենց նկատմամբ ուժ չեն գործադրել, իսկ մեքենայ նստեցնելուն պէս սկսել են մեղայ գալ, հարցնել` «հօ շատ չցաւեցրի՞նք»: Ոստիկանական բաժանմունքներում սուրճ ու թէյ են հիւրասիրել, եւ ամենաուշագրաւը` ոմանք թունդ հայհոյանքներ են հնչեցրել` ուղղուած ոչ թէ ցուցարարներին կամ ընդդիմութեանը, այլ՝ հէնց Նիկոլ Փաշինեանի անձին:
Հայհոյողներն այնքան շատ են եղել, որ ցուցարարներն անգամ զարմացել են նրանց համարձակութեան փաստից: Մեզ պատմեցին, որ գրեթէ ամէն երկրորդ ոստիկան խնդրել է իրենց. «Մի բան արէք` սրանցից շուտ ազատուենք», քանի որ յոգնել են արդէն «էս բարդակ վիճակից»: Իսկ չեն միանում փողոցում հաւաքուած ցուցարարներին, որովհետեւ «չեն ուզում աշխատանք կորցնել», յատկապէս որ չգիտեն` կը յաջողի՞ ընդդիմութիւնը, թէ՞ ոչ»:
