Չնայած երիտասարդ տարիքին՝ լիբանանահայ լուսանկարիչ Արմեն Քելեշյանը հասցրել է լուսանկարել այնպիսի հայտնիների, ինչպիսիք են Dr. Dre-ն, Քանյե Ուեսթը, Սնուփ Դոգը, Ուիզ Խալիֆան, Թայգան և այլ հայտնի ռեփերներ ու ժամանակակից երգիչներ: Քելեշյանը մասնագիտացած է ռեփ, հիփ-հոփ և ժամանակակից ժանրի այլ համերգներ ու միջոցառումներ լուսանկարելու և աստղային կյանքը լուսաբանելու գործում: Նրա սարքի չխկոցների տակ են հայտնվել այս ասպարեզի բոլոր աստղերը:
Հայ տղայի մասին գրել է արտասահմանյան մամուլը, իբրև ռեփերների և հիփ-հոփ երգիչների լավագույն լուսանկարները ստեղծած լուսանկարչի:
Արմեն Քելեշյանը սովորել է Լիբանանում՝ հայկական դպրոցում, լուսանկարչությանն անդրադարձել է 16 տարեկանում, այնուհետև ինքն իր համար ճանապարհ է հարթել՝ անձամբ կապվելով համերգների կազմակերպիչների և աստղերի պրոդյուսերների հետ: Հաջողությունները հաջորդել են մեկը մյուսին, և այսօր Արմեն Քելեշյանը ԱՄՆ-ի երաժշտական կյանքը լուսաբանող լավագույն լուսանկարիչներից է: Նա այն եզակիներից է, որ ընթրել է Շոն Քոմսի՝ Դիդիի և այլ աստղերի առանձնատներում, ազատ մուտք ունի ստուդիաներ, պրոդյուսերական կենտրոններ և սրճարաններ, որտեղ այցելում են աստղերը: Իսկ մեծ համերգներին և Գրեմիի մրցանակաբաշխությանը նա մուտք է գործում ինչպես յուրային, ճամբորդում է աստղերի հետ և ստեղծում լուսանկարչական ամբողջական շարքեր:
(Լուսանկարները՝ Արմեն Քելեշյանի կայքում armenkeleshian.com և Ինստագրամի էջում): Կայքի «Դիմանկարներ» բաժնում կան նաև հայտնի ու անհայտ մարդկանց դիմանկարները, որոնց նա գեղարվեստական շունչ է տվել:
Հայ լուսանկարչի աշխատանքները տպագրվում են երաժշտական ամսագրերում և կայքերում, The New York Times-ում, Billboard-ում, GQ-ում, Complex-ում, Highsnobiety-ում, Hypebeast -ում,Genius-ում, Showtime-ում, Revolt-ում և այլ հայտնի հարթակներում:
Ամերիկյան մամուլի հետ հարցազրույցում Արմենն ասել է, որ իր ստացած հայկական կրթության և հայկական դաստիարակության համար պարտական է ծնողներին. Քելեշյանի հայրը հայկական ցեղասպանության հարցերով հետազոտող Միսաք Քելեշյանն է, մայրը՝ Լիբանանի հայկական համայնքում հասարակական գործիչ՝ Մայդա Քուրեջյանը:
Արմեն Քելեշյանը
Ավելի շատ լուսանկարներ՝ Արմեն Քելեշյանի Ինստագրամում