2.09c
Երեվան
ուրբ, փտր 27
Յունիսի 30-ին, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, Գեւորգեան հոգեւոր ճեմարանի հանդիսութիւնների դահլիճում տեղի ունեցաւ ճեմարանի` 2021-2022 ուսումնական տարուայ փակման հանդիսութիւնը:
Միջոցառումը բացուեց միասնական Տէրունական աղօթքով, որից յետոյ հնչեցին ՀՀ եւ Գեւորգեան հոգեւոր ճեմարանի օրհներգերը:
Ներկաներին իր ողջոյնի խօսքը յղեց Գեւորգեան հոգեւոր ճեմարանի տեսուչ Հոգեշնորհ Տ. Շահէ ծայրագոյն վարդապետ Անանեանը: Հայր Սուրբը, շնորհակալութիւն յայտնելով Վեհափառ Հայրապետին ճեմարանի եւ ճեմարանի սաների հանդէպ մշտական ու հետեւողական հայրական խնամքի եւ հոգածութեան, ինչպէս նաեւ Գեւորգեան հոգեւոր ճեմարանի եւ Սեւանի Վազգէնեան հոգեւոր դպրանոցի, Քահանայից պատրաստման լսարանի տեսչական անձնակազմերին եւ դասախօսներին կատարուած կարեւոր աշխատանքի ու ներդրման համար, ընդգծեց, որ ճեմարանի ամավերջեան հանդիսութիւնը իւրայատուկ եւ աւանդաբար փոխանցուած մի ձեւ է ամփոփելու անցնող տարուայ ձեռքբերումները եւ յոյսի վճռական աչքերով նայելու եկող ուսումնական տարուայ հեռանկարներին ու հնարաւորութիւններին:
«Փառք երկնաւոր Տիրոջը, որ այսօր կարող ենք արձանագրել․ ճեմարանն անցնող ուս. տարուայ ընթացքում յաղթահարեց բոլոր դժուարութիւնները` վերագտնելով իր բնականոն ընթացքը: Դարերով ամրագրուած ու բազում վայրիվերումներով անցած, հոգեւոր համակեցութեան եւ դաստիարակութեան վրայ յենուած ճեմարանական կրթութեան շարունակականութիւնը լաւագոյն երաշխիքն է քահանայական սուրբ կոչման հասունացման համար: Այդ փորձառութիւնը, որպէս հոգեւոր ապրումի եւ գիտելիքի օրինակելի համադրում, անցեալում պահպանել եւ դրա վրայ գուրգուրացել են մեր հերոսական ու փառապանծ նախնիները: Ճեմարանը, ճեմարանական կրթութիւնն ու կեանքը, ճեմարանում դասաւանդելու բարձր եւ պատասխանատու առաքելութիւնը նրանք շատ յաճախ ընկալել են որպէս աղօթասացութիւն, սաղմոսասացութիւն, սրբազան գործ», -նշեց Հայր Շահէն` յաւելելով, որ ճեմարանում ուսանելն ու դասաւանդելը յարատեւ, սրբազան ու համբերատար գործընթաց է` լի ամենատարբեր դժուարութիւններով, շատ յաճախ յուսահատական պահերով, բայց այդ երկար գործընթացը պսակւում է հոգեւորական դառնալու եւ հոգեւորական դաստիարակելու հաստատուն պատրաստակամութեամբ, Փրկչին, Նրա հիմնած եկեղեցուն եւ ազգին ծառայելու անմնացորդ նուիրումի գիտակցութեամբ:
Այնուհետեւ հոգեւոր եւ ազգային երգերի կատարումներով հանդէս եկաւ Գեւորգեան հոգեւոր ճեմարանի երգչախումբը: Ճեմարանի 5-րդ լսարանի սան Սեյրան սարկաւագ Վահրադեանն ասմունքեց Կոստան Զարեանի «Մեր Հայրենիքիը» բանաստեղծութիւնը: Ուսանողութեան անունից խօսք ասաց աւարտական 6-րդ լսարանի սան Բարեշնորհ Նարեկ սարկաւագ Գասպարեանը:
Հանդիսութեան ընթացքում կատարուեց նաեւ նուիրաբաշխութիւն: Ամենայն Հայոց Կաթողիկոսի ձեռամբ ուսման մէջ բարձր առաջադիմութեան եւ կարգապահութեան համար պարգեւների արժանացան Գեւորգեան հոգեւոր ճեմարանի, Սեւանի Վազգէնեան հոգեւոր դպրանոցի եւ Քահանայից պատրաստման լսարանի ուսանողները:
Ցերեկոյթի վերջում ներկաներին իր հայրական պատգամն ու օրհնութիւնը բերեց նաեւ Ամենայն Հայոց Հայրապետը:
«Հայաստանեայց Առաքելական Սուրբ Եկեղեցու հոգեւոր-կրթական բարձրագոյն հաստատութիւնները սնուցող անօթներն են Հայոց Եկեղեցու հոգեփրկչական առաքելութեան, դարբնոցները մեր Սուրբ Եկեղեցու լուսաւոր ապագայի, երաշխաւոր կաճառները նրա սրբազան ժառանգութեան: Գեւորգեան հոգեւոր ճեմարանը` իբրեւ մայր կրթարան, շուրջ մէկ ու կէս դար սրբազան առաքելութիւն է իրականացնում ազգային-եկեղեցական մեր կեանքում: Այս հաստատութեանն է վստահուած հաւատաւոր, նուիրեալ, ծառայասէր հայ հոգեւորականի կերտումը, ազգանուէր հոգեւոր առաջնորդների դաստիարակութիւնը»,-ասաց Նորին Սրբութիւնը եւ յաւելեց, որ հայրենիքի ու Եկեղեցու առջեւ ծառացած նորօրեայ մարտահրաւէրները պահանջում են, որպէսզի Հայ Եկեղեցու հոգեւոր սպասաւորները գործեն առկայ հրամայականներին համարժէք եւ կիրառեն ժամանակի ընծայած բոլոր միջոցները` բազմարդիւն դարձնելու Եկեղեցու տէրունապատուէր առաքելութիւնը:
Նորին Սրբութիւնը կարեւոր նկատեց ազգային-քրիստոնէական արժեհամակարգի ամրապնդումը եւ ազգային, հայեցի կրթութեան առաւել զօրացումը:
«Այս ամէնը ուղեգծում է նաեւ, թէ հոգեփրկչական առաքելութեան ծիրից ներս ինչպիսի՛ն պէտք է լինի Հայոց Եկեղեցու հովուական ծառայութիւնը առաջիկայ տարիներին: Այս համատեքստում կարեւոր է մեր հոգեւոր-կրթական հաստատութիւնների դերակատարութիւնը` իրավիճակի պահանջներին համարժէք հոգեւորականների պատրաստութեան գործում: Յատկապէս առանձնայատուկ ուշադրութիւն պէտք է դարձուի հովուական, հոգեխնամ եւ քարոզչական առաքելութեան հմտութիւնների զարգացմանը, նախաձեռնողական ոգուն, կազմակերպչական ունակութիւններին, որպէսզի հոգեւորականաց հոգեշահ ծառայութեամբ զօրանան մեր ժողովրդի արժէքային ընկալումները, ազգային գիտակցութիւնը եւ պատասխանատուութիւնն ու լաւատեսութիւնը վաղուայ օրուայ նկատմամբ»,- ընդգծեց Ամենայն Հայոց Կաթողիկոսը:
Անդրադառնալով մերօրեայ հոգեւոր հովիւների առաքելութեանը` Վեհափառ Հայրապետն ի մասնաւորի ընդգծեց. «Եկեղեցականն այսօր պէտք է լինի Աստծոյ պատուիրանների օրինակելի իրագործողը, սփոփողը որդեկորոյս ընտանիքի, օգնականը կեղծ արժէքներից շփոթահար երիտասարդի, աջակիցը կարիքի մէջ գտնուողի, քաջալերողը վհատուած զինուորի եւ hոգեւոր խորհրդատուն, հարկ եղած դէպքում` նաեւ յանդիմանողը հասարակական-քաղաքական կեանքում անարդարութեան դրսեւորումների, որպէսզի նորոգուի ու բարելաւուի կ'եանքը»:
Դիմելով ճեմարանի դասախօսական անձնակազմին` Նորին Սրբութիւն թելադրեց, որ հոգեւորականների նոր սերունդ պատրաստելու ճանապարհին ջանադիր աշխատանքով գիտելիքներ եւ իմացութիւն մատուցելու հետ մէկտեղ շարունակեն սաներին կոփել ու ձեւաւորել հոգեւոր նկարագրով ու ազգային գիտակցութեամբ, ոգեշնչեն եկեղեցական մեծ գործիչների օրինակով` զօրացնելով նրանց հոգիներում հաւատն առ Աստուած, նուիրումը Հայ Եկեղեցուն եւ սերն առ ազգն ու հայրենին:
Ամավերջեան փակման հանդիսութեան առիթով Գարեգին Երկրորդ Հայրապետն իր գնահատանքը յայտնեց տեսչական անձնակազմին ու նրանց զօրաւիգ սպասաւորներին` մաղթելով, որ Տիրոջ օրհնութեամբ առաւել արդիւնաւորուի նրանց պատասխանատու ծառայութիւնը:
Նորին Սրբութիւնը նաեւ իր բարեմաղթանքն ու օրհնութիւնը բերեց ճեմարանի սաներին` աղօթելով, որ Բարին Աստուած ուսումնառութեան ընթացքում առաւել լուսաւորի նրանց միտքն ու հոգին եւ հաստատուն պահի հոգեւոր կոչման եւ նախանձախնդիր` ծառայանուիրումի մէջ:
«Մեծ է Մեր սպասումը ձեզանից, սիրելի ճեմարանականներ: Գործունէութեան ընդարձակ անդաստան կայ, ուր կարիքն ունենք բազում նուիրեալ ու նախանձախնդիր նոր մշակների»,- նշեց Հայոց Հայրապետը` մաղթելով, որ Տիրոջ օրհնութեամբ հոգեւոր կրթական հաստատութիւնների հունձքը միշտ բարեբեր եւ առատ լինի հայ ժողովրդի հոգեւոր-ազգային կեանքի պայծառութեան համար:
Հանդիսութիւնը եզրափակուեց Նորին Սրբութեան «պահպանիչէ աղօթքով:
2021-222 ուսումնական տարում ճեմարանն աւարտեց 24 սան:
