3.09c
Երեվան
երկ, դկտ 22
Փետրուարի 17-ին, Սրբոց Ղեւոնդեանց եւ Վարդանանց տօների առիթով Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ, Մայր Աթոռ Սուրբ Էջմիածնում տեղի ունեցաւ քահանայից հաւաք, որին իրենց մասնակցութիւնը բերեցին Հայաստանի տարբեր թեմերից 231 եկեղեցականներ, թեմակալ առաջնորդներ եւ Մայր Աթոռի միաբաններ:
Այս կապակցութեամբ Արմաւիրի թեմի Սուրբ Աստուածածին եկեղեցում (ք․էջմիածին), Ամենայն Հայոց Կաթողիկոսի հանդիսապետութեամբ, մատուցուեց Սուրբ եւ Անմահ Պատարագ:
Պատարագիչն էր Կոտայքի թեմի Չարենցաւան քաղաքի Սուրբ Փրկիչ եկեղեցու հոգեւոր հովիւ Արժանապատիւ Տ. Համազասպ քահանայ Հագեյանը:
Իր քարոզում Տէր Հայրն ի մասնաւորի նշեց․ «Վարդանանց եւ Ղեւոնդեանց խորհուրդը նման է ճառագայթի, որը սկզբնաւորուել է եւ չի աւարտւում, այն շարունակւում է մինչեւ մեր օրերը: Այն մեր ազգային ինքնութեան եւ պահպանման, քրիստոնէական մեր հաւատքի նկատմամբ հաւատարմութեան եւ հայրենիքի հզօրացման ու շէնացման սրբազան առաքելութիւնն ու ընթացքն է»:
Տէր Համազասպը փաստեց նաեւ, որ այսօր էլ Հայ Առաքելական Սուրբ Եկեղեցին շարունակում է հաւատարիմ մնալ Ղեւոնդեանց պատգամին, որի վառ վկայութիւնն է Արցախեան վերջին պատերազմին հոգեւորականների մասնակցութիւնը:
Սուրբ Պատարագի աւարտին եկեղեցականաց դասը մէկտեղուեց Գեւորգեան հոգեւոր ճեմարանի հանդիսութիւնների դահլիճում, ուր կատարուեց պարգեւաբաշխութիւն:
Ներկաներին ողջունեց Շիրակի թեմի առաջնորդ եւ քահանայից հաւաքի կազմակերպիչ յանձնախմբի պատասխանատու Գերաշնորհ Տ. Միքայէլ արքեպիսկոպոս Աջապահեանը:
Այնուհետեւ տեղի ունեցաւ աւանդական շնորհաբաշխութիւնը: Ի գնահատութիւն Հայոց Եկեղեցու անդաստանում երկարամեայ վաստակի, նուիրեալ եւ արդիւնաւոր հովուական ծառայութեան` մի շարք եկեղեցականների շնորհուեց աւագ քահանայութեան պատիւ, ծաղկեայ փիլօն եւ լանջախաչ կրելու իրաւունք:
Աւագ քահանայութեան պատուի արժանացաւ Կոտայքի թեմից Արժանապատիւ Տ․ Յովսէփ քահանայ Ալեքսանեանը:
Ծաղկեայ փիլօն կրելու իրաւունք շնորհուեց Արագածոտնի թեմից Արժանապատիւ Տ․ Փառեն քահանայ Առաքելեանին եւ Տ․ Վրթանես քահանայ Բաղալեանին:
Քահանայական լանջախաչ կրելու իրաւունքի արժանացան Գուգարաց թեմից Արժանապատիւ Տ․ Արտավազդ քահանայ Սիմոնայնը, Գեղարքունիքի թեմից Տ․ Դանիէլ քահանայ Մկրտչեանը եւ Տ․ Յարութիւն քահանայ Յունանեանը, Շիրակի թեմից Տ․ Գարեգին քահանայ Սարգսեանը, Արցախի թեմից Տ․սեպուհ քահանայ Յակոբեանը, Տ․ Յուսիկ քահանայ Դոխոլեանը եւ Տ․հովնան քահանայ Յովհաննիսեանը, ՀՀ Զու հոգեւոր առաջնորդութիւնից Տ․ Տրդատ քահանայ Գեւորգեանը, Արագածոտնի թեմից Տ․ Մաղաքիայ քահանայ Գեւորգեանը, Վայոց Ձորից Տ․ Ներսէս քահանայ Աշուղբաբեանը եւ Տ․ Արամ քահանայ Կարապետեանը, Սիւնեաց թեմից Տ․ Տիգրան քահանայ Յակոբեանը, Ուկրաինայի թեմից Տ․ Մամբրէ քահանայ Հմայակեանը եւ Տ․ Արտաշէս քահանայ Յակոբեանը:
Շնորհաբաշխութեան աւարտին Ամենայն Հայոց Կաթողիկոսը, իր օրհնութիւնը բերելով հոգեւորականաց դասին եւ շնորհաւորելով վերջիններիս Սրբոց Ղեւոնդեանց եւ Վարդանանց տօների առիթով, նշեց․ «Մայր Աթոռ Սուրբ Էջմիածնում կազմակերպուող ամենամեայ այս հաւաքները առիթ են դարերի խորքից մեզ փոխանցուած պատգամների վերարծարծման եւ տիրաւանդ մեր առաքելութեան մէջ Սրբոց Ղեւոնդեանց եւ Վարդանանց ոգով ու հայրենասիրութեամբ զօրանալու համար»:
«Ազգային մեր ինքնութեան, մեր հաւատի ու հոգեւոր արժէքների պահպանութեան, մեր պետականութեան, Արցախի մեր քոյրերի եւ եղբայրների ազատ կեանքի իրաւունքի պաշտպանութեան պայքարը մեր ժողովրդի համար դարձել է չընդհատուող, չաւարտուող իրականութիւն: Հայաստանի եւ Արցախի շուրջ մտահոգիչ զարգացումները, ազգային եւ հայրենական կեանքում յառնած խնդիրները, արտաքին մարտահրաւէրները այսօր էլ ազգն ու հայրենիքը կանգնեցրել են անվտանգային, գոյաբանական լուրջ խնդիրների առջեւ, ինչպիսին Սրբոց Վարդանանց ժամանակներում»,–արձանագրեց Վեհափառ Հայրապետը` նկատելով, որ ստեղծուած դժուարին իրավիճակը հայ ժողովուրդը կարող է յաղթահարել իր հաւատքի զօրութեամբ, ամուր կամքով, միասնական ջանքերով եւ մշտապէս առ Աստուած ապաւինութեամբ:
Հայոց Հովուապետը, կարեւորելով առկայ մարտահրաւէրների պայմաններում հոգեւոր դասի տէրունապատուէր առաքելութեան մէջ ջանքերի ու ծառայութեան առաւել արդիւնաւորումը, յատկապէս կրթական-քարոզչական ոլորտում, ընդգծեց․ «Մեծապէս կարեւոր է մարդկանց սրտերում հոգեւոր-բարոյական արժէքների սերմանումը, ազգային ոգու եւ հայրենասիրութեան զօրացումը, քանզի ամէնքիս մտահոգող արատաւոր երեւոյթներ եւ շատ հարցեր հիմնականում հետեւանք են արժէքային դաշտում արձանագրուած նահանջի, աւանդական ընկալումների տկարացման: Կրթական տարբեր ծրագրերով, նաեւ արդի տեխնոլոգիաների ընձեռած հնարաւորութիւններով պէտք է զօրացնենք քարոզչութիւնը` ամրապնդելու հաւատքը, յոյսը եւ սերը մեր ժողովրդի` Աստուածաշնչի ուսուցմամբ եւ մեր Սուրբ Եկեղեցու ամբողջական ճանաչողութեամբ»:
44-օրեայ պատերազմի հետեւանքով ստեղծուած մտահոգիչ իրավիճակում Նորին Սրբութիւնը կարեւորեց հովուական խնամքը հոգեւոր եւ հոգեբանական զօրակցութեան կարիքն ունեցող առանձին խմբերի նկատմամբ:
«Մասնաւոր ուշադրութիւն հարկ է դարձնել զոհուածների, վիրաւորների, գերեվարուածների եւ անյայտ կորածների ընտանիքներին, ինչպէս նաեւ տեղահանուած կամ Լաչինի փակ միջանցքի պայմաններում բաժանուած արցախցի ընտանիքներին: Առաջնային մեր պարտաւորութիւններից է նաեւ մանուկներին եւ երիտասարդներին մեր Եկեղեցու հետ կապելը` Աւետարանի լոյսով եւ մեր Սուրբ Եկեղեցու օրհնութեամբ պաշտպանելու նրանց մերօրեայ աշխարհի բազում մոլորութիւններից եւ գայթակղութիւններից»,–ասաց Ամենայն Հայոց Հայրապետը:
Գոհունակութեամբ անդրադառնալով աշխարհսփիւռ եկեղեցական կառոյցների եւ բարերար նուիրեալ հայորդիների աջակցութեամբ վերջին տարիներին առաւել ընդլայնուած Մայր Աթոռ Սուրբ Էջմիածնի եւ հայաստանեան թեմերի սոցիալական աշխատանքներին` Նորին Սրբութիւնն իր գնահատանքը բերեց թեմակալ առաջնորդներին եւ հովիւներին` կարեւոր այդ առաքելութեան մէջ դրսեւորած նախանձախնդրութեան համար:
Բարձրորերն գնահատելով քահանայ հայրերի նախանձախնդիր եւ նուիրեալ ծառայութիւնը` Հայոց Հովուապետը յորդորեց․ «Քրիստոսով զօրացեալ քաջ, անվեհեր ու համարձակ եղէք ձեր հոգեւոր սպասաւորութեան մէջ` ճշմարտութեան ճանապարհով առաջնորդելու մեր ժողովրդին` ի խնդիր հայրենական ու ազգային մեր կեանքը խաթարող թիւր ընթացքների եւ երեւոյթների յաղթահարման: Ազգանուէր ու եկեղեցանուէր ծառայութեամբ եւ մշտարթուն հովուի աննկուն ոգով, իբրեւ մերօրեայ ղեւոնդ երէցնէր շարունակէք ջանքեր ներդնել յանուն Հայոց Եկեղեցու պայծառութեան եւ մեր ժողովրդի հոգեւոր կեանքի բարօրութեան»:
Ապա Ամենայն Հայոց Հայրապետը շնորհաւորեց պարգեւների ու պատիւների արժանացած եկեղեցականներին` մաղթելով արդիւնաւէտ ծառայութիւն ու նորանոր ձեռքբերումներ իրենց տէրունապատուէր առաքելութեան մէջ:
Նորին Սրբութիւնը նաեւ ծանուցեց, որ տարիների վաստակաշատ նուիրեալ ծառայութեան բարձր գնահատանքով արքութեան պատուի են արժանանում Մայր Աթոռի եկեղեցական հայեցակարգային բաժնի տնօրէն Գերաշնորհ Տ․ Վազգէն եպիսկոպոս Միրզախանեանը, Տաւուշի թեմի առաջնորդ Գերաշնորհ Տ․ Բարգրատ եպիսկոպոս Գալստանեանը եւ Մայր Աթոռի դիւանապետ Գերաշնորհ Տ․ Արշակ եպիսկոպոս Խաչատրեանը:
Վերջում իր գնահատանքը բերելով Հայ Եկեղեցու ողջ հոգեւոր դասին` Նորին Սրբութիւնը հայցեց, որ Բազումողորմ Տէրը խաղաղութեան եւ ապահովութեան մէջ պահի Հայաստանն ու Արցախը, շէն ու բարօր` հանուր հայութեան կեանքը:
