20.09c
Երեվան
երք, սպտ 17
«Օրհնեա՜լ է Աստուած եւ Հայրը մեր Տէր Յիսուս Քրիստոսի, որ Իր առատ ողորմութեամբ մեզ վերստին ծնեց կենդանի յոյսի համար՝ մեռելներէն Յիսուս Քրիստոսի յարութեամբ» (Ա Պետ. Ա 3)՝ Փառքի Տէրն (Ա Կորնթ. Բ 8) Իր Ամենազօր Յարությամբ ամչցուց այս աշխարհի իմաստուններուն ու հզօրներուն, իսկ «իրենք իրենց բան մը կարծողներուն ոչնչի վերածեց » (հմմտ. Ա Կորնթ. Ա 27-28), «իշխանութիւններուն եւ պետութիւններուն զինաթափ ըրաւ, » (Կողոս. Բ 15), « լուսաւոր դարձնելով կեանքն ու անմահութիւնը» (Բ Տիմ. Ա 10):
Փրկչի կենսահաստատ Յարութեամբ խրախուսուած է, որ աներկիւղ (Ա Յովհ. Դ 18) կը հռչակենք. « Ու՞ր է քու յաղթանակը, մա՛հ, ու՞ր է քու խայթոցը, դժո՛խք» (Օսէէ ԺԳ 14, Ա Կորնթ. ԺԵ 55), քանզի Քրիստոս ճշմարտապէս Յարութիւն առաւ:
«Մեր մեղքերու համեմատ չի վարուեցաւ մեզի հետ, ոչ ալ մեր անօրէնութեան համեմատ հատուցեց մեզի»(Սղմ. ՃԲ 10), այլ Արդարն Արդարութեան դէմ մեղանչածներուս համար մահ ճաշակեց, որպէսզի մեզի մօտեցնէ Աստծոյ (հմմտ. Ա Պետ. Գ 16): Անարժաններուս համար Մարդեղացած Լոյսը խաչի ճանապարհն անցաւ աւելի մեր անյոյսութիւնն ի չիք դարձնելու համար, քան Իր Սէրն ապացուցելու։
Գործուն հաւատով (Յակ. Բ 17 ) փառաբանենք մեր Փրկիչին՝ մեզ մեռած համարելով մեղքի համար (Հռոմ. Զ 11), որու ծառայութիւնէն Տէրը մեզ փրկագնեց՝ կորսուած պատիւը (Սղմ. ԽԸ 13,21) վերականգնելով (Սղմ. ՃԶ 14), մահակիր թանձր խաւարէն կանչելով Իր սքանչելի լոյսին(Ա Պետ. Բ 10), որպէսզի շահինք Քրիստոսին եւ վայելենք Իր Լոյսը (հմմտ.Փիլիպ. Գ 8 -9) :
Տէր եւ Աստուած դաւանելով՝ ճանաչենք Իր « Յարութեան զօրութիւնը » (Փիլիպ. Գ 10), քանզի Ան Ինքն է « Յարութիւն եւ Կեանք» (Յովհ. ԺԱ 25), սոսկ Յարութեան միջոց չէ, այլ՝ կեանքի ու Յարութեան միակ Պատճառը:
Լոյս Յարութիւնն է ճշմարիտ Աստուած ճանաչողութեան Կենդանի Վէմը (Ա Պետ. Բ ) եւ սեփական գոյութիւնն արդարացնող Հաւատի (Հռոմ. Դ 5 ) Անկիւնաքարը, չ՚ամչցնող Յոյսի (Հռոմ. Ե 5 ) խրախոյսն ու Աստուածատեսութեան արժանացնող Սիրոյ (Ա Յովհ. Բ 5) գրաւականը:
Խաւարի անպտուղ գործերէն անմասն մնալով (Եփես. Ե ), արժանի ըլլանք Կեանքի Աղբիւրին (Սղմ. ԼԵ 10 ) մեզի տրուած Շնորհին եւ Լոյսի որդեգրութիւնն երախտագիտութեամբ ընդունելով՝ « արթո՛ւն ըլլանք եւ սիրոյ ու հաւատի զրահները հագնինք եւ փրկութեան յոյսի սաղաւարտը դնենք. որովհետեւ Աստուած մեզ չի նախասահմանեց բարկութեան համար, այլ՝ փրկութիւնը ժառանգելու համար՝ մեր Տէր Յիսուս Քրիստոսի միջոցով. Ան մեռաւ մեզի համար, որպէսզի արթուն ըլլանք թէ ննջենք, անոր հետ միասի՛ն ապրինք։ (Ա Թեսաղ. Ե 8-10):
Միակ Բարի Աստուծոյ ( Մարկ. Ժ 18) Կամքը կատարելով ( Յովհ. Զ 40 )՝ անօրինակ Յարութեամբ Իր Աստուածութիւն բացապարզած Քրիստոսին ժառանգակից դառնանք (Հռոմ. Ը 17 ):
Փառք Քրիստոսի Ամենազօր Յարութեան. Ամէն:
Մեր աղօթքն է որ Բարին Աստուած Գանատահայոց Եկեղեցական Դասին, Թեմական ու Ծխական Խորհուրդներուն, պատուարժան անդամներուն, Տիկնաց Յանձնախումբերուն ու Դպրաց Դասերուն, Ասուածասէր ու ազգանուէր բարերարներուն, ազգային, բարեգործական, կրթական ու մշակութային միութիւններու, հաստատութիւններու անդամներուն կենաց արեւշատութիւն պարգեւէ եւ զօրավիգ ըլլայ` ազգաշահ առաքելութիւնն իրագործելու գործունէութեանը:
Տիրոջ օրհնութեամբ՝ Սուրբ Յարութեան Լոյսի ջահը լուսաւորէ Ձեզ եւ Ձեր ընտանեկան յարկերը։
Աղօթքով եւ օրհնութեամբ՝
Տ. Աբգար եպս. Յովակիմեան
Առաջնորդ Գանատահայոց Թեմի
