15.09c
Երեվան
ուրբ, ապր 19
25 Յունուարին, Աշխատանքային այցելութեամբ Պրիւքսէլ գտնուող Հայաստանի արտաքին գործոց նախարար Արարատ Միրզոյեան հանդիպում ունեցաւ Եւրոպական միութեան արտաքին գործերու ու անվտանգութեան քաղաքականութեան հարցերով բարձր ներկայացուցիչ Ժոզեփ Պորելի հետ:
Հանդիպման ընթացքին կողմերը միտքեր փոխանակած են տարածաշրջանային անվտանգութեան եւ կայունութեան հարցերու վերաբերեալ։ Նախարար Միրզոյեան բարձր գնահատած է Հայաստանի մէջ Եւրոմիութեան քաղաքացիական մշտադիտարկման առաքելութեան տեղակայման մասին որոշումը։
Արարատ Միրզոյեան Ժոզեփ Պորելի ուշադրութիւնը հրաւիրած է Ատրպէյճանի կողմէ Լաչինի միջանցքի ապօրինի արգելափակման հետեւանքով Լեռնային Ղարաբաղի մէջ ստեղծուած մարդասիրական ճգնաժամին: Շեշտուած է, որ Ատրպէյճանը, 9 նոյեմբերի եռակողմ յայտարարութեան դրոյթներու համաձայն, անյապաղ պէտք է դադրեցնէ Լաչինի միջանցքի արգելափակումը։
Հայկական կողմը կարեւորած է միջազգային հանրութեան կողմէ գործուն քայլերու իրականացումը՝ Լեռնային Ղարաբաղը էթնիկ զտումներու ենթարկելու Ատրպէյճանի քաղաքականութիւնը կանխարգիլելու համար։
ՀՀ Արտաքին գործոց նախարարը եւ Եւրոմիութեան բարձր ներկայացուցիչը քննարկած են Հայաստան-Ատրպէյճան յարաբերութիւններու կարգաւորման գործընթացի շուրջ զարգացումները:
Անդրադարձ կատարուած է նաեւ Հայաստան-Թուրքիա յարաբերութիւններու կարգաւորման գործընթացին:
Հանդիպման օրակարգին մէջ եղած են նաեւ Հայաստան-ԵՄ գործընկերութեան հետագայ զարգացման առնչուող հարցեր:
