Մենք ԼՂ-ի մէջ խաղաղապահներու վերաբերեալ Երեւանէն առաջարկներ չենք ստացած. Լաւրով

Մենք ԼՂ-ի մէջ խաղաղապահներու վերաբերեալ Երեւանէն առաջարկներ չենք ստացած. Լաւրով

Ռուսիա ռուս խաղաղապահներու գործունեութեան վերաբերեալ առաջարկներ դեռ չէ ստացած։ Այս մասին խօսած է Ռուսիոյ Դաշնութեան արտաքին գործոց նախարար Սերկէյ Լաւրովը` անդրադառնալով ՀՀ վարչապետ Նիկոլ Փաշինեանի յայտարարութեանը։  Տեղեկութիւնը կը յայտնէ ՌԻԱ Նովոստին։

«Մենք չենք տեսած յստակ առաջարկներ, որոնք ՀՀ վարչապետը կ'ուզէ քննարկման դնել Լեռնային Ղարաբաղի մէջ ռուսական խաղաղապահ գործողութեան վերաբերեալ։ Ես չեմ կրնար գուշակութիւն ընել»,- ըսած է Լաւրով։

Ան նշած է, որ պայմանաւորուածութիւններ ձեռք բերած կողմերէն իւրաքանչիւրը` Ռուսաստանի, Ատրպէյճանի նախագահները եւ Հայաստանի վարչապետը, իրաւասու են լրացուցիչ նախաձեռնութիւններ առաջարկելու:

Փաշինեան երէկ յայտարարած էր, որ անհրաժեշտ է Լեռնային Ղարաբաղի մէջ խաղաղապահ գործողութեան մանրամասները ճշգրտել։ Ան նշած է, որ Հայաստանի ու Ռուսիոյ ստորագրութիւնները բաւարար են ԼՂ-ի մէջ խաղաղապահներու մանթատն ամբողջութեամբ իրագործելու համար, իսկ եթէ ոչ, ուրեմն անհրաժեշտ է միջոցներ ձեռնարկել այդ մանթատը միջազգայնօրէն հաստատելու կամ խաղաղապահները աւելի լայն միջազգային մանթատով օժտելու ուղղութեամբ։

Յիշեցնենք` 3 օգոստոսին ատրպէյճանական ստորաբաժանումները թիրախաւորած են Պաշտպանութեան բանակի մարտական դիրքերն ու զօրամասերէն մէկու մշտական տեղակայման վայրը՝ կիրառելով տարբեր տրամաչափի հրաձգային զինատեսակներ, ականանետներ, նռնականետներ եւ հարուածային ԱԹՍ-ներ։ Հայկական կողմն ունի 2 զոհ եւ 19 վիրաւոր։