18.09c
Երեվան
երկ, հնս 16
Իսրայէլը պատրաստ է իրադարձութիւններու որեւէ զարգացման, այդ շարքին՝ Իրանի հետ լայնածաւալ պատերազմի, ըսած է Իսրայէլի վարչապետի գրասենեակի խորհրդական Տմիթրի Կենտելմանը։
Անորմէ խնդրած են մեկնաբանել Իրանի հետ լայնածաւալ զինուած հակամարտութեան հնարաւորութիւնը։ «Իսրայէլ պատրաստ է իրադարձութիւններու որեւէ զարգացման», - պատասխանած է Կենտելմանը։
Միաժամանակ, վարչապետի գրասենեակի խորհրդականը ընդգծած է, որ Իսրայէլը «առաջին հերթին յոյսը կը դնէ իր սեփական ռազմական ուժերու եւ կարողութիւններու վրայ՝ թէ՛ պաշտպանութեան, թէ՛ յարձակման ժամանակ»։
Յունիս 13-ի գիշերը Իսրայէլի Պաշտպանութեան բանակը յայտարարած է «Առիւծներու ազգ» գործողութեան մեկնարկի մասին, որու նպատակն է վնաս հասցնել Իրանի միջուկային եւ հրթիռային ծրագրերուն։ Ատկէ ետք Իսլամական Հանրապետութեան շարք մը բնակավայրերու մէջ տեղակայուած կառոյցներ ենթարկուած են հարուածներու։
The New York Times թերթի տուեալներով՝ իսրայէլեան ուժերը յարձակած են Թեհրանի շրջակայքը գտնուող վեց ռազմակայաններու վրայ։ Մինչդեռ Իրանի պետական IRNA գործակալութիւնը յայտնած է, որ Նաթանզ քաղաքին մէջ՝ աթոմային կառոյցի տարածքին մէջ, տեղի ունեցած է պայթում։
Դէպքերու կապակցութեամբ Իրանի Գերագոյն առաջնորդ Ալի Խամենէին հանդէս եկած է ուղերձով՝ դիմելով քաղաքացիներուն։ Ան յայտարարած է, որ բանակին տուած է «գործելու ազատութիւն»՝ Իսրայէլի հարուածներուն պատասխանելու հարցով։
