-1.91c
Երեվան
հնգ, դկտ 12
Իրանը ապացոյցներ ունի, որ Սուրիոյ մէջ նախագահ Պաշշար Ասատի վարչակարգի տապալումը Միացեալ Նահանգներու, Իսրայէլի եւ Սուրիոյ հարեւան մէկ այլ երկրի ծրագրի հետեւանք է. նման պնդմամբ հանդէս եկած է Իրանի գերագոյն առաջնորդ այաթոլլա Ալի Խամենէին, գրած է Mehr գործակալութիւնը:
«Սուրիոյ մէջ տեղի ունեցածն ամերիկեան եւ սիոնիստական համատեղ ծրագրի հետեւանք է: Սուրիոյ հարեւան մէկ այլ երկիր յստակ դերակատարում ունեցած է այս հարցով եւ կը շարունակէ ունենալ. սա ակնյայտ է բոլորի համար, բայց հիմնական դաւադիրը, գլխաւոր ծրագրաւորողը Միացեալ Նահանգները եւ սիոնիստական ռեժիմն են: Մենք ապացոյցներ ունինք, որոնք կասկածի տեղիք չեն տար», -ըսած է Իրանի գերագոյն առաջնորդը:
Նոյեմբերի վերջը Սուրիոյ մէջ իսլամիսթական խմբաւորումներու դաշինքը յարձակում սկսած է կառավարութեան կողմէ վերահսկուող տարածքներու վրայ։ Նոյեմբեր 30-ին իսլամիսթները գրաւած են Հալէպը, իսկ դեկտեմբերի սկզբը՝ Համան եւ Հոմսը։ Դեկտեմբեր 8-ին հակակառավարական զօրքերը մտած են Դամասկոս եւ յայտարարած Պաշշար Ասատի վարչակարգը տապալելու մասին։
Ինչպէս այն ժամանակ յայտնած էր Ռուսիոյ արտաքին գործոց նախարարութիւնը, Սուրիոյ առաջնորդը բանակցութիւններ վարած է իսլամիսթներու հետ, հրաժարական տուած է եւ լքած երկիրը։ Այնուամենայնիւ, իսլամիսթները յայտարարած են 10 միլիոն տոլարի պարգեւատրութիւն այն տեղեկատւութեան համար, որ կ՚օգնէ ձերբակալել նախկին նախագահը։ Աւելի ուշ յայտնի դարձած է, որ Պաշշար Ասատն ընտանիքի հետ ժամանած է Ռուսիա, ուր անոր ապաստան տուած են։
