Ազգային Եղիշէ Մանուկեան Վարժարանը պատնէշի վրայ. Կատարուած է հանգանակութիւն

Ազգային Եղիշէ Մանուկեան Վարժարանը  պատնէշի վրայ.  Կատարուած է հանգանակութիւն

Պէյրութի մէջ տիրող պայմաններուն  առընթեր  կ՚իրականացուին կարեւոր միջոցառումներ ոտքի պահելու համար հայկական  վարժարանները։

Լիբանանեան կտրուածքով իր ուրոյն տեղն ունի  Եղիշէ Մանուկեան  Ազգային Վարժարանը, որուն  պատասխանատու մարմինները, գլխաւորութեամբ տիկին Անի Բագրատունիի  կարեւոր ճիգեր  կ՚իրականցնեն  շարունակելու համար հայեցի  դաստիարակութիւն  ջամբելու  հիմնարար  առաքելութիւնը։

Այս  առումով եւ  «Ազդակ»էն  ստացուած տեղեկութիւններու հիմամբ օրերս վարժարանը նախաձեռնած է   կենսական դարձած հանգանակութեան արշաւ մը, որ պսակուած է մեծ  յաջողութեամբ։

Այնու կը ներկայացնենք այս առթիւ Պէյրութի մէջ լոյս տեսած   թղթակցութիւնը, մշտանորոգ աւիւն եւ  յարատեւութիւն  մաղթելով պատնէշի վրայ մնացող մեր  հայրենակիցներուն։

«Ազդակ» կը գրէ ՝

 

Ազգային Եղիշէ Մանուկեան քոլեճի ամբողջութեամբ վերանորոգուած մանկամսուրի բացման հանդիսութիւնը տեղի ունեցաւ 29 ապրիլ 2022-ին, երեկոյեան ժամը 8:00-ին, հովանաւորութեամբ Լիբանանի թեմի առաջնորդ Շահէ արք. Փանոսեանի,  նախագահութեամբ ճարտարարուեստի նախարար Ճորճ Պուչիկեանի, ներկայութեամբ երեսփոխաններ` տէր եւ տիկին Յակոբ Թերզեանի եւ Ալեքս Մաթոսեանի, ինչպէս նաեւ` Ազգային իշխանութեան պատուարժան նախագահին, ատենապետներու, անդամներու, ՀՅԴ Լիբանանի Կեդրոնական կոմիտէի ներկայացուցիչի, շրջանի կոմիտէի  ներկայացուցիչներու, Ուսումնական խորհուրդի ներկայացուցիչներու, մանկամսուրի բարերարներ տէր եւ տիկին Վիգէն եւ Օսի Քէսմէեաններու եւ շուրջ 100 բարեկամ- բարերարներու:

Առաջին հերթին տեղի ունեցաւ հանդիսաւոր բացումը մանկամսուրին, որ կոչուեցաւ Օսի Քէսմէեանի անունով:

Բացման հանդիսութեան յաջորդեց մտերմիկ ընթրիք մը` քոլեճի սրահին մէջ: Ընթրիքի ընթացքին սրտաբուխ նուիրատուութեամբ հանգանակուեցաւ 38.150 ամերիկեան տոլար   եւ 232.400.000 լ.ո.:

Տէր եւ տիկին Ռոստոմ Պոյաճեան, որոնք Միացեալ Նահանգներէն յատկապէս այս ձեռնարկին համար եկած էին, գնահատելով քոլեճիս կրթական յաջողութիւնները եւ գիտակցելով մեր ծնողներուն դիմագրաւած նիւթական դժուարութիւններուն` 10.000 տոլար նուիրեցին քոլեճին: Այս աշխատանքի յաջողութեան մէջ մեծ ներդրում ունեցան քոլեճիս խնամակալութիւնը եւ տիկնանց յանձնախումբը:

Վարձքը կատար բոլորին: Աստուած հազարապատիկով գնահատէ բոլոր նուիրատուները: