19.09c
Երեվան
երկ, մրտ 31
ԱՄՆ-ն Քաթարի միջնորդներու միջոցով նոր առաջարկ փոխանցած է «Համաս»-ին՝ փորձելով ազատել ամերիկացի պատանդ Էտան Ալեքսանտըրը եւ վերսկսիլ Կազայի մէջ հրադադարի շուրջ բանակցութիւնները: «Արմէնփրէս»-ի հաղորդմամբ՝ այս մասին հաղորդած է Axios լրատուական հարթակը՝ վկայակոչելով իսրայէլցի եւ ամերիկացի պաշտօնեաները:
Ինչպէս յայտարարած են աղբիւրները, առաջարկով նախատեսուած է, որ Միացեալ Նահանգներու նախագահ Տանըլտ Թրամփը հանդէս գայ յայտարարութեամբ՝ կոչ ընելով հանգստութիւն պահպանելու Կազայի մէջ եւ վերսկսելու բանակցութիւնները մշտական հրադադարի շուրջ՝ Ալեքսանտըրը ազատ արձակելու դիմաց:
Յայտնի չէ՝ արդեօք «Համաս»-ը պիտի ընդունի այս առաջարկը։
«Դեռ համաձայնութիւն չկայ»,-ըսած է ամերիկացի պաշտօնեան։
Իսրայէլցի պաշտօնեան յայտարարած է, որ նոր առաջարկն «պարզապէս գաղափար է, որ լիովին յստակ կամ մշակուած չէ»:
Մինչդեռ արաբ դիւանագէտը, խօսելով The Times of Israel հրատարակութեան հետ, կասկած յայտնած է, թէ «Համաս»-ը կը համաձայնի Ալեքսանտըրը ազատ արձակել միայն Թրամփի յայտարարութեան դիմաց։ Անոր կարծիքով՝ պաղեստինեան շարժումը կը պահանջէ աւելի էական ինչ-որ բան։
Արաբ դիւանագէտի խօսքով՝ Քաթարի եւ Եգիպտոսի միջնորդները Տոհայի մէջ «Համաս»-ի պատուիրակութեան հետ հանդիպած են մարտ 27-ի երեկոյեան՝ քննարկելու ԱՄՆ-ի վերջին առաջարկը:
Թէ Իսրայէլն ինչպէս կ՚արձագանգէ ատոր, նոյնպէս պարզ չէ:
