32.46c
Երեվան
կրկ, օգս 09
ԻՐԱՔ- («Ալ-Սաֆիր»-Պէյրութ)- Շաբաթ օր, Իրաքի Սինճար քաղաքի ծայրամասը, 10 քմ հեռաւորութեան վրայ գտնուող Ղընէյ Ալ Քատիմէ (Հին Ղընէ) գիւղին մէջ, բացայատուած է հաւաքական գերեզմանոց մը, որ կը պարփակէ 123-ի հասնող եզիտի կիներու, երեխաներու, տղամարդոց աճիւններ, որոնք սպաննուած են «Իսլամական Պետութեան» կողմէ (ՏԱՀԷՇ): Գերեզմանը շրջափակուած եղած է 127 ինքնանշան աշխատող պայթուցիկ թակարդներով, որոնք վնասազերծուած են Իրաքի ուժային մարմիններուն կողմէ: Քաղաքը, ահաբեկչական կազմակերպութենէն ազատագրումէն ի վեր, այս մէկը 6-րդ գերեզմանն է, որ կը յայտնաբերուի իշխանութիւններու կողմէ, եւ բոլորն ալ պատկանած են եզիտիներու, որոնք սպաննուած են կամ՝ գլխատուած ծայրայեղական կազմակերպութեան ձեռքով: Իրաքի քրտական իշխանութիւնները այս ամսու կէսերուն նոյնպէս գերեզման մը յայտնաբերած էին, որ կը պարունակէր տասնեակ եզիտի կիներու աճիւններ, որոնք նոյնպէս սպաննուած էին ԻՊ-ին կողմէ: Յիշենք, որ «Տահէշ»ի կողմէ Սինճարի գրաւումը տեղի ունեցած էր 2014-ի Օգոստոսին, կազմակերպութիւնը ահռելի վայրագութիւններ գործած էր հոն բնակող եզիտի փոքրամասնութեան դէմ: Նշենք նաեւ, որ 2014-ի ամրան ԱՄՆ կողմէ Իրաքի վրայ օդային յարձակումներու մեկնարկման յայտարարուած պատճառներէն մէկը հանդիսացած էր ահաբեկչական կազմակերպութեան կողմէ եզիտիներու դէմ իրագործուած այս յարձակումները: ՄԱԿ-ի եւ Ուաշինկթընի մէջ գործող «Հոլոքոսթի թանգարան» ին կողմէ եզիտիներու դէմ եղած վայրագութիւնները ճանչցուեցան որպէս «ցեղասպանութիւն»:
