16.09c
Երեվան
ուրբ, ապր 04
Սուրիացի քիւրտերու հիմնած «Ժողովրդավարական միութիւն» (PYD) կուսակցութեան զինուած ջոկատները պատրաստ են վար դնելու զէնքը՝ պայմանաւ, որ իրենց հնարաւորութիւն տրուի մասնակցելու քաղաքական գործունէութեան։
«Արմէնփրէս»-ի հաղորդմամբ՝ այդ մասին յայտարարած է PYD-ի ղեկավար Սալիհ Մուսլիմը՝ Al Arabiya հեռուստաալիքին մեկնաբանելով Թուրքիոյ մէջ արգիլուած Քիւրտիստանի աշխատաւորական կուսակցութեան (PKK) առաջնորդ Ապտուլլա Օճալանի կոչը զինուած կազմաւորումներուն՝ վար դնելու զէնքը։
«Եթէ մեզի թոյլ տան աշխատիլ քաղաքական ոլորտի մէջ, զէնքի կարիք չըլլար», -ըսած է ան՝ ընդգծելով, որ «զէնք կրելու անհրաժեշտութիւնը դեռ գոյութիւն ունի՝ հաշուի առնելով թրքական կրկնուող յարձակումները»։
Մուսլիմը նաեւ նշած է, որ կուսակցութիւնը կը սպասէ PKK-ի քոնկրեսի որոշման, ուր կրնայ յայտարարուիլ կուսակցութեան լուծարման մասին։
Աւելի վաղ իր ուղերձին մէջ, որ լրագրողներու համար ընթերցած են DEM քրտամէտ կուսակցութեան ներկայացուցիչները, Թուրքիոյ մէջ ցմահ բանտարկութիւն կրող Օճալանը PKK-ի հետ կապուած բոլոր կազմաւորումներուն կոչ ըրած է վար դնելու զէնքը եւ դադրեցնելու զինուած առճակատումը Թուրքիոյ դէմ, իսկ PKK-ին՝ լուծարուիլ։
