24.09c
Երեվան
չրք, սպտ 09
Իսրայէլ շարք մը պատժամիջոցներ պիտի սահմանէ Մեծն Բրիտանիոյ նկատմամբ, որոնց կարգին՝ Երուսաղէմի մէջ բրիտանական հիւպատոսութեան փակումը, ի պատասխան Արեւմտեան ափին մէջ հրէական բնակավայրերու նկատմամբ պատժամիջոցներ սահմանելու Լոնտոնի որոշման։ Ինչպէս կը հաղորդէ BBC-ն, այս մասին յայտարարած է Իսրայէլի արտաքին գործոց նախարար Կիտէոն Սաարը։
Սեպտեմբեր 8-ին Մեծն Բրիտանիոյ արտաքին գործոց նախարար Էտուարտ Միլիպենտը յայտարարած էր, որ կ՚արգիլէ առեւտուրը Յորդանան գետի Արեւմտեան ափին գտնուող հրէական բնակավայրերուն հետ, որոնք միջազգային իրաւունքի տեսանկիւնէ անօրինական կը համարուին։ Լոնտոն միջոցներ պիտի ձեռնարկէ այն ընկերութիւններուն եւ անհատներուն դէմ, որոնք կ՚աշխատին այդ բնակավայրերուն մէջ։ Միաժամանակ, Միլիպենտի խօսքով, Իսրայէլի հետ առեւտուրը՝ անոր օրինական սահմաններուն մէջ, պիտի չսահմանափակուի։
Իսրայէլ արձագանգած է Մեծն Բրիտանիոյ այս որոշման։ Կիտէոն Սաար յայտարարած է, որ վարչապետ Բենիամին Նաթանիահուի համաձայնութեամբ որոշում կայացուած է յառաջիկայ 30 օրուան ընթացքին Երուսաղէմի մէջ բրիտանական հիւպատոսութիւնը փակելու մասին։
Իսրայէլի կողմէ մէկ այլ պատասխան միջոց պիտի ըլլայ բրիտանացի ներկայացուցիչներու հեռացումը Իսրայէլի հարաւային Քիրեաթ Կաթ քաղաքին մէջ գործող Կազայի միջազգային աջակցութեան կեդրոնէն։
Բացի այդ, կը դադրեցուի Արեւմտեան ափին Պաղեստինի ինքնավարութեան ուժերու պատրաստութեան ուղղուած բրիտանական գործունէութիւնը։
Միւս հակամիջոցը պիտի ըլլայ հակասեմական եւ հակաիսրայէլեան գործունէութեան մասնակցած 12 բրիտանացի ընտրուած ներկայացուցիչներու եւ Մեծն Բրիտանիոյ այլ քաղաքացիներու մուտքի արգելումը Իսրայէլ։
