27.09c
Երեվան
շբթ, հլս 19
Իսրայէլեան ուժերուն պատկանող անօդաչու թռչող սարքը հարուած հասցուցած է Դամասկոսի կեդրոնին։ «Արմէնփրէս»-ի հաղորդմամբ՝ այս մասին յայտնած է սուրիական Al Ikhbariah հեռուստաալիքը։
Աւելի վաղ ստացուած տեղեկութիւններու համաձայն՝ յուլիս 16-ի կէսօրին Դամասկոսի կեդրոնին իսրայէլեան հրետակոծութեան հետեւանքով վիրաւորուած է երկու քաղաքացիական անձ:
Վերջին երկու օրերու ընթացքին իսրայէլեան ուժերը նաեւ կը թիրախաւորեն Սուէյտա քաղաքի քանի մը շրջաններ՝ ի պաշտպանութիւն տուրզիներու։
Իր հերթին SANA գործակալութեան թղթակիցը յայտնած է, որ Իսրայէլի կողմէ մայրաքաղաք Դամասկոսին ուղղուած ռմբակոծութիւններու հետեւանքով շարք մը վիրաւորներ արձանագրուած են. այլ մանրամասնութիւններ չեն հաղորդուած։
Syria TV-ի տեղեկացմամբ՝ Իսրայէլի բանակը նոր օդային հարուած հասցուցած է Սուրիոյ բանակի գլխաւոր շտաբի շէնքին, որ կը գտնուի Syria TV հեռուստաընկերութեան դիմաց։ Օդային հարուածի ուժգին պայթումը ստիպած է աշխատակիցները լքել հիմնարկը։
Աւելի վաղ Իսրայէլի բանակը յայտարարած էր, որ թիրախաւորած է Դամասկոսի մէջ գտնուող Սուրիոյ զինուած ուժերու գլխաւոր շտաբի մուտքը։
Արաբական եւ տարածաշրջանային երկիրները դատապարտած են Իսրայէլի յարձակումները Սուրիոյ տարածքի վրայ՝ աջակցելով Սուրիոյ միասնութեան եւ ինքնիշխանութեան։
