9.09c
Երեվան
շբթ, փտր 21
Իրադրութիւնը ՀՀ արեւելեան սահմանագօտիին վրայ, ուր տեղակայուած հայկական դիրքերուն վրայ երէկ լայնածաւալ յարձակում գործած էին Ատրպէյճանի զինուած ուժերու ստորաբաժանումները, Նոյեմբեր 17-ի, ժամը 10։00-ի դրութեամբ, յարաբերականօրէն կայուն է, կրակի դադրեցման պայմանաւորուածութիւնը հիմնականին մէջ կը պահպանուի։
Այս մասին կը յայտնեն ՀՀ Պաշտպանութեան նախարարութենէն, նշելով, որ Նոյեմբեր 16-ի մարտական գործողութիւններուն հետեւանքով հակառակորդը ունի մինչեւ 70 զոհուած եւ վիրաւոր զինուոր, ինչպէս նաեւ զինուորական սարքերու զգալի կորուստ։
Հայկական կողմը ունի 1 զոհուած եւ 13 գերեվարուած զինուոր։ Եւս 24 զինուորի հետ կապը կորած է մարտական գործողութիւններու ընթացքին եւ անոնց ճակատագիրը այս պահուն անյայտ է։ Զինուորներու յայտնաբերման ուղղութեամբ կ'ընթանան շեշտուած աշխատանքներ։ Հակառակորդի վերահսկողութեան տակ անցած է երկու մարտական յենակէտ։
Ռուսական կողմի միջնորդութեամբ կ'ընթանան բանակցութիւններ՝ ստեղծուած իրավիճակի հանգուցալուծման եւ գերեվարուած հայ զինուորներու վերադարձին շուրջ։
