13.09c
Երեվան
չրք, հնս 25
«Յարգելի Սերգէյ Վիքթորովիչ, հայ ժողովուրդը ողջունում է Ձեզ Հայաստանում: Բարի գալուստ Երեւան»: Այս մասին Յունիս 9-ին ԱԳՆ-ի դիմաց բողոքի գործողութեան ժամանակ յայտարարեց ընդդիմադիր «Հայաստան» խմբակցութեան պատգամաւոր Արամ Վարդեւանեանը:
Պատգամաւորին խօսքով` Ռուսիոյ ԱԳՆ-ի ղեկավարը պէտք է արձանագրէ, որ Հայաստանի մէջ այժմ իշխանութեան ղեկին գտնուող մարդոց խումբն ընդամէնը պաշտօնական ուժ է: «Նրանք այլեւս չեն ներկայացնում հայ ժողովրդի եւ Լեռնային Ղարաբաղի Հանրապետութեան, այսինքն` Արցախի շահերը: Ռուսաստանի Դաշնութիւնը եղել է եւ կը լինի Հայաստանի եւ հայ ժողովրդի դաշնակիցը, եղբայրական երկիր մեզ համար:
Միեւնոյն ժամանակ, բոլորս գիտենք, որ վերջին չորս տարիների ընթացքում զուտ պաշտօնական իշխանութեան ղեկին գտնուող մարդկանց այս խումբն արել է հնարաւոր ամէն ինչ` Ռուսաստանի եւ Հայաստանի յարաբերութիւններին սպառնալիքներ ստեղծելու համար: Դա փաստ է: Վստահ ենք, որ մօտ ապագայում, հէնց որ տէ իւրէ մարդկանց այս խումբն այլեւս չի լինի իշխանութեան, այդ սպառնալիքները կը վերանան, եւ Հայաստանը հզօր երկիր կը դառնայ, որն Արցախի, մեր եղբայրների եւ քոյրերի անվտանգութեան իրական երաշխաւորն է: Եւ դա փաստ է, դա փաստ է», ըսաւ ընդդիմադիրը:
Վարդեւանեանի խօսքով` իշխանութեան մէջ գտնուող մարդիկ կը ներկայացնեն միայն իրենց շահերը. «Եթէ նոյնիսկ տարբեր խոստումներ տան, յայտարարեն որոշակի փաստաթղթեր ստորագրելու պատրաստակամութեան մասին, այդ ամէնն իրաւական ուժ չի ունենայ: Դա ընդհանրապէս չի լինի», ընդգծեց պատգամաւորը:
