13.09c
Երեվան
չրք, ապր 29
Լիբանանում 98 տարեկանում մահացել է Սուրսոկ ազնվական ընտանիքի անդամներից մեկը՝ Լեդի Իվոն Քոշրան Սուրսոկը: Նա համարվում էր Բեյրութի հանրահայտ Սուրսոկ թանգարանի տիրուհիներից մեկը, 1960-ականներին եղել է Սուրսոկի կոմիտեի նախագահը, Լիբանանում հնագույն տների և բնակավայրերի պաշտպանության ասոցիացիայի հիմնադիրը, որի նախագահն էր 1960-2002 թթ. : Նրա ամուսինը եւրոպական ծագմամբ բարձրաստիճան զինվորական էր, որ մահացել է 1979-ին:
Լեդի Սուրսոկի մահվան լուրը հայտնել է Սուրսոկ թանգարանը, նշելով, որ Սուրսոկների պատմական առանձնատունը, որտեղ ապրում էր Լեդին, տուժել է Բեյրութի նավահանգստի պայթումից, ինքը՝ Լեդի Սուրսոկն էլ վիրավորվել և տեղափոխվել էր ընտանեկան ամառանոց, որտեղ բուժվում էր: Նրա մահվամբ, ինչպես նշված է հաղորդագրության մեջ, շրջվեց Լիբանանի քրիստոնեական պատմության ևս մեկ էջ:
Լեդի Սուրսոկը՝ Լիբանանի նախագահ Շարլ Հլուի հետ
Լեդի Սուրսոկը՝ Սուրսոկների՝ 1860-ին կառուցած տուն-պալատում, որտեղ բնակվում էր
Սուրսոկների 160-ամյա տուն-պալատը՝ 2020 թ.-ի օգոստոսի 4-ի պայթումից հետո
Սուրսոկ ընտանիքը Լիբանանի հույն ուղղափառ տոհմերից է, որոնք կրում են բյուզանդական ավանդույթներ:
Համարվում է Լիբանանի յոթ հնագույն և ազնվական ընտանիքներից մեկը, Լիբանանում հաստատվել է 1700-ականներին: Սուրսոկները կառուցել են առանձնատներ, որոնց մեծ մասը կտակել են Բեյրութին՝ մշակութային և պատմական կենտրոններ դարձնելու պայմանով:
Սուրսոկի առանձնատներից մեկում տեղակայված է Լիբանանի ժամանակակից արվեստի թանգարանը, որ գտնվում է Բեյրութի Էշրաֆիե շրջանի Ռու Սուրսոկ փողոցում: Այդ փողոցում են գտնվում նաև Սուրսոկներից և այլ հարուստ ընտանիքներից մնացած ամրոցներ, տուն-պալատներ: Սուրսոկի թանգարանի շենքը լիբանանյան ճարտարապետության հիանալի օրինակ է, որը կրում է իտալական, հատկապես, վենետիկյան և օսմանյան ճարտարապետությունների ազդեցությունը:
Ժամանակակից արվեստի գործերից բացի, թանգարանում պահվում են նաև ճապոնական փորագրություններ և իսլամական արվեստի աշխատանքներ, ընդհանուր առմամբ արվեստի 5000 նմուշ, որոնց մեջ մտնում են նկարներ, քանդակներ, ճենապակի, ապակե աշխատանքներ, գրքեր, որոնք թվագրվում են 18-20-րդ դարերին: Շենքում գործում են գրադարաններ, գրախանութ, երաժշտական սրահներ:
Թանգարանի բոլոր կարևոր ցուցադրություններին ներկա էր լինում Լեդի Սուրսոկը:
Թանգարանը նույնպես վնասվել է Բեյրութի նավահանգստի աղետից
Սուրսոկ թանգարանը՝ մինչև պայթումը
Լուսանկարները՝ Սուրսոկների ժառանգության կայքից
