5.09c
Երեվան
հնգ, նմբ 07
Օրերս Պէյրութի մերձ գտնուող «Մըզհէր» շրջանի «Աղբալեան» կեդրոնէն ներս տեղի ունեցած ընտանեկան մտերմիկ ճաշկերոյթ, որուն մասին «Արեւելք» տեղեկացաւ ՀՅԴ Լիբանանի Պատանեկան Միութիւններու դիմատետրի էջէն.
Ստորեւ կը ներկայացնենք այդ մասին ներկայացուցած լրատւութիւնը՝
Կազմակերպութեամբ՝ Հ.Յ.Դ. «Աղբալեան» Պատանեկան Միութեան, Շաբաթ, 30 Ապրիլ 2022-ին «Աղբալեան-Հ.Մ.Ը.Մ» համալիրի «Արա Գըրճլեան» պարտեզէն ներս տեղի ունեցաւ ընտանեկան մտերմիկ ճաշկերոյթ մը մասնակցութեամբ միութեան կազմակերպած ոտնագնդակի մրցաշարքի մասնակից աշակերտներուն, պատանիներուն եւ իրենց ծնողներուն:
Ճաշկերոյթին ներկայ գտնուեցան նաեւ երեսփոխաններ Յակոբ Թերզեան եւ Ալեքսան Մաթոսեան, «Ն. Աղբալեան» եւ «Հ. Մարուխեան» կոմիտէներու ներկայացուցիչները, ինչպէս նաեւ Ազգային Եղիշէ Մանուկեան Քոլէճի տնօրէնութիւնը:
Մթնոլորտը ճոխացուցին ընկերուհի Կալիա Գարկայեան ազգային երգով, ընկեր Հրանդ Կիրակոսեան տհոլի զարկերով, Իսկ Էտի Նալպանտեան եւ Լորի Կիւլիւմեան ազգային երգերով։
Աւարտին իրենց սրտի խօսքերը յայտնեցին երեսփոխան Յակոբ Թերզեան, Ազգային Եղիշէ Մանուկեան Քոլէճի տնօրէնուհի՝ Անի Բագրատունի եւ Կեդրոնական կոմիտէի անդամ՝ ընկեր Արամ Սոմունճեան։
Ճաշկերոյթը աւարտեցաւ պատանիներու ճոխ մթնոլորտով։
Աղբալեան պատանեկան միութեան վարիչ կազմին հետ կրնաք կապ հաստատել հետեւեալ թիւով՝ 70-261950:
