1.09c
Երեվան
երք, փտր 10
ԱԺ «Հայաստան» խմբակցութիւնը ընդունած է 2 սեպտեմբերին Արցախ այցելելու Արցախի ԱԺ նախագահի հրաւէրը: Այս մասին իր դիմատետրեան էջին գրած է «Հայաստան» խմբակցութեան պատգամաւոր Գեղամ Մանուկեանը:
«Սեպտեմբերի 2-ին ՀՀ Ազգային ժողովն ԱՐՑԱԽԻ ՀԱՆՐԱՊԵՏՈՒԹԻՒՆ այցելելու պաշտօնական հրաւէր ունի։ Ո՞վ է գալու.. Նոր ջրբաժան։
Արցախի Հանրապետութեան խորհրդարանի նախագահն այսօր շտապել էր արձագանգել թիւրըմբռնման առիթ դարձած լուրերին, թէ Հայաստանի ընդդիմութիւնն Ազգային ժողովում է լինելու սեպտեմբերին, երկար-բարակ գրառում էր արել, որն յատուկ է իր ոճին։ Յետոյ պարզաբանեց այդ շտապողականութեան պատճառը։
Արցախի Հանրապետութեան Ազգային Ժողովի իրարայաջորդ երկու պաշտօնական գրութիւններում կրկնել է Արցախ այցելելու, սեպտեմբերի 2-ին, Արցախի Հանրապետութեան օրուան մասնակցելու հրաւէրը, որն ուղղուած է Հայաստանի Հանրապետութեան Ազգային Ժողովի ԲՈԼՈՐ խմբակցութիւններին։ Անցնող երկու տարիներին, կապիտուլացիոն յայտարարութիւնից յետոյ, շատերս ենք այցելել Արցախ։ Պատգամաւորական կարգավիճակով շատ ընդդիմադիր գործիչներ մշտապէս եղել ենք Արցախի Հանրապետութիւնում։ Հրաւէրի չենք սպասել։ Անգամ մեր այցը խոչընդոտուեց Հայաստանի իշխանութիւնների եւ նրանց ակնարկով՝ ռուս խաղաղապահների կողմից։ Բայց հակառակ դրան, Արցախում միշտ զգացել ենք իբրեւ մեր տանը։ Արցախի Հանրապետութեան ԱԺ նախագահ Արթուր Թովմասեանին, ԱԺ ԲՈԼՈՐ խմբակցութիւնների ներկայացուցիչներին էլ հանդիպել ենք տարբեր ձեւաչափերով։ Այս հրաւէրն էլ ենք ընդունելու։
Շատերս սեպտեմբերի 2-ին կը լինենք Արցախում։ ԲԱՅՑ։ Շատ կարեւոր է, որ Արթուր Թովմասեանի հրաւէրն ընդունի Հայաստանի ԱԺ քաղաքական մեծամասնութիւնը։ Ակնան իր հայրենիք համարած, լուսանկարներով կիսուած, յետոյ իր իսկ շեֆի ստորագրութեամբ առանց մէկ կրակոցի թշնամուն յանձնած Հայաստանի ԱԺ ներկայիս նախագահը, հետաքրքիր է, կ'արձագանգի՞ Արցախի իր գործընկերոջ հրաւէրին։ Քաղաքացիական պայմանագիր խմբակցութեան քանի՞ պատգամաւոր սեպտեմբերի 2-ին կը լինի Արցախում, Ստեփանակերտում առնուազն։ Լաւ առիթ է, վերջապէս կարելի է գումարել Հայաստանի եւ Արցախի Հանրապետութիւնների ԱԺ միջխորհրդարանական համատեղ նիստը։ Այն չի կայացել արդէն 2 տարուց աւել։ Ընդդիմութեան բազում անգամներ հնչեցրած պահանջն անտեսուել է Հայաստանի ԱԺ ղեկավարութեան կողմից։ Պատճառաբանումներից մէկն Արցախի Հանրապետութեան ԱԺ նախագահին ինչ-որ անհիմն յղում տալն էր, որն Արթուր Թովմասեանը յետոյ հերքեց։ Հիմա արդէն Արցախի Հանրապետութեան խորհրդարանը պաշտօնապէս ԲՈԼՈՐԻՍ հրաւիրում է Արցախ, սեպտեմբերի 2-ին։ Ընդդիմադիր պատգամաւորներն, անգամ առանց հրաւէրի, գնալու են։ Իշխանականները Արցախի պաշտօնական հրաւէրն ընդունելու՞ են։
Ժամանակը գնաց։
Յ.Գ. լուսանկարներից մէկում 2022թ. ապրիլի 12-ին, ՀՀ ԱԺ Հայաստան խմբակցութեան պատգամաւորներով սպասում ենք Աղաւնօ գիւղի անցակէտում, որ թոյլատրուի Արցախ այցելութիւնը...»,- գրած է ան:
Նշենք, որ երէկ Արցախի ԱԺ նախագահը ուղերձով դիմած էր Հայստանի խորհրդարանականներուն եւ 2 սեպտեմբերին հրաւիրած էր Արցախ Հանրապետութեան օրը նշելու, համատեղ քննարկումներ կայացնելու:
