Ռուսիոյ նախագահ Վլատիմիր Փութին յայտարարած է, որ Ուքրանիոյ մէջ յատուկ ռազմական գործողութիւնը կրնայ տեւական գործընթաց դառնալ։ Այս մասին ան ըսած է Ռուսիոյ Դաշնութեան նախագահին առընթեր մարդու իրաւունքներու խորհուրդի անդամներու հետ հանդիպման ժամանակ։ Այս մասին յայտնած է interfax.ru-ն:
«Ինչ կը վերաբերի յատուկ ռազմական գործողութեան արդիւնքներու երկար գործընթացին, ապա, ի հարկէ, սա կրնայ երկար գործընթաց դառնալ: Բայց դուք նշեցիք, որ նոր տարածքներ յայտնուած են, սա շատ նշանակալի արդիւնք է Ռուսիոյ համար, սա լուրջ հարց է», -ըսած է Փութին:
«Եւ ի՞նչ թաքցնենք: Ազովի ծովը դարձաւ Ռուսիոյ Դաշնութեան ներքին ծովը: Ասոնք լուրջ բաներ են: Դեռ Պետրոս Առաջինը կը պայքարէր Ազովի ծով հասնելու համար», -ըսած է ան:
Ռուսիոյ նախագահն ընդգծած է, որ ամենակարեւորը մարդիկ են, որոնք կ'ապրին այս տարածքներուն վրայ։
«Հանրաքուէի արդիւնքները ցոյց տուին, որ մարդիկ կ'ուզեն ըլլալ Ռուսիոյ կազմին մէջ: Եւ անոնք իրենց կը համարեն այս աշխարհի մէկ մասը, այս տարածութեան, մեր ընդհանուր մշակոյթի, աւանդոյթներու, լեզուի մէկ մասը: Եւ սա ամենակարեւոր արդիւնքն է: Եւ անոնք այժմ մեզի հետ են: Եւ ասոնք միլիոնաւոր մարդիկ են, սա ամենակարեւորն է»,-ըսած է Փութին։
Միաժամանակ ան ընդգծած է, որ Ռուսիոյ Դաշնութեան մէջ լրացուցիչ զօրահաւաքի մասին խօսիլը իմաստ չունի, ատոր կարիքը չկայ։