Այսօր Գորիսի բժշկական կենտրոնում ծնվել է 2020-ի դեկտեմբերի 15-ին ադրբեջանական գերությունից վերադարձած Նարեկ Սարդարյանի երրորդ որդին: Ծնողները նրան կոչել են Դավիթ:
Սյունիքի մարզի Ներքին Խնձորեսկի բնակիչ Նարեկ Սարդարյանը գերի էր ընկել մինչեւ 2020-ի սեպտեմբերի 27-ի պատերազմը՝ 2020-ի հուլիսի 8-ին՝ նախիջեւանյան սահմանից՝ Սիսիանի տարածաշրջանում, որտեղ զբաղվում էր անասնապահությամբ: Ադրբեջանը նրան, ի տարբերություն նախորդ տարիներին գերեվարված հայ զինվորների եւ քաղաքացիների, չի ներկայացրել որպես դիվերսանտ:
Հայաստանի ԱԱԾ-ն Նարեկ Սարդարյանի՝ Ադրբեջանում հայտնվելու դեպքով հարուցել է քրգործ՝ մարդուն առեւանգելու հոդվածով:
Նարեկի գործը հայ փաստաբանների միջոցով հասել էր նաեւ Մարդու իրավունքների եւրոպական դատարան:
30-ամյա Նարեկը գերության մեջ մնացել է հինգ ամիս եւ վերադարձվել ռուս խաղաղապահների միջնորդությամբ: Ընտանիքը չի ուզում հիշել ծանր ամիսները, այլ մտածում է կյանքը շարունակելու, ընտանիքն ամուր պահելու մասին: Շնորհավորում ենք Նարեկին եւ նրա կնոջը՝ Հերմինեին, ամուր կամքի եւ նորածին որդու ծննդյան առթիվ: