Պուրճ Համուտի քաղաքապետութիւնը պատնէշի վրայ. Քաղաքապետ Մարտիկ Պօղոսեանի նոր նախաձեռնութիւնը

 Պուրճ Համուտի քաղաքապետութիւնը պատնէշի վրայ. Քաղաքապետ Մարտիկ Պօղոսեանի նոր նախաձեռնութիւնը

Բոլորիս քաջ յայտնի է, որ սփիւռքով մէկ սփռուած հայութեան, Հայաստանի եւ ողջ հայութեան համար իւրայատուկ տեղ ու դեր ունի Պուրճ Համուտ հայկական աւանը։ 

 

 Աւելի քան տարիներու կենսագրութիւն ունեցող այս քաղաքը, հակառակ բազմապիսի դժուարութիւններու, հակառակ պատերազական վիճակներուն եւ հակառակ այսօր տիրոծ դժուարին պայմաններուն կը շարունակէ իր երթը։

 Այդ ընդհանուր երթին մէջ իւրայատուկ տեղ ունեցած է Պուրճ Համուտի քաղաքապետութիւնը, իր քաղաքապետներով, ամբողջական համակարգով եւ տեսլականով։ 

 Ի զուր ըսուած չէ, որ Հայր Պօղոս Արիսի օրերուն Լիբանանի հասարկութեան մէջ իր տեղը հաստատած, աւելի ուշ Յակոբ Աշճեանի օրերուն որպէս քաղաք կերտուած, իսկ աւելի ուշ Ցոլակ Թիւթէլեանի ժամանակներուն երկրի քաղաքացիական պատերազմի անթիւ-անհամար վէրքերու դարմանումի օրերուն նոր ոգի առած Պուրճ Համուտը կերտեց իրական նկարագիր։

Այսօր ալ տարբեր չէ պատկերը։ Ճիշդ է կան բազում դժուարութիւններ, տնտեսական եւ ապահովական մեծագոյն մարտահրաւէրներ, ու ատոր դիմաց կայ գործելու կամք եւ նուիրումի իրական տեսլական ու այդ ընթացքին մէջ իր ուրոյն տեղն ու ստորագրութիւնը ունի Պուրճ Համուտի քաղաքապետ Մարտիկ Պօղոսեան։

Պօղոսեան, որ շնորհիւ իր բազմածիր կապերուն, լիբանանեան ամենատարբեր կողմերուն հետ ունեցած բարձր մակարդակի յարաբերութիւններուն կարողացաւ շատ կարճ ժամանակի մը ընթացքին իր ստորագրութիւնը զետեղելէ բացի նոր երանգ հաղորդել առկայ երթին։

Բնականաբար Պուրճ Համուտի քաղաքապետութեան գործունէութեան առընթեր կարեւորագոյն գործակից կը համարուի Հայ Յեղափոխական Դաշնակցութիւնը, որ բոլորանուէր մօտեցումներով թեւ եւ թիկունք կը համարուի քաղաքապետարանին ու շնորհիւ այդ գործակցութեան է նաեւ, որ քաղաքապետութիւնը հակառակ ամենադժուարին պայմաններուն կը շարունակէ իր առաքելութիւնը։

Այս բոլորին ելակէտը վերջերս Պուրճ Համուտի քաղաքապետութեան կողմէ հրապարակուած հաղորդագրութիւնն է, որ արդիական ոճով կառավարական համակարգ մը որդեգրելու կապուած նոր նախաձեռնութեան մը մասին կը խօսի հարթելու համար տարբեր մակարդակի խնդիրները, որոնք առկայ են Լիբանանի քաղաքապետութիւններու գործունէութեան ոլորտին մէջ։ 

 

     «Ա»

Պուրճ Համուտի քաղաքապետարանին մէջ տեղի ունեցած պաշտօնական հանդիսութեամբ եւ մամլոյ ասուլիսով բացումը կատարուեցաւ քաղաքապետական ծառայութիւններու շրջանային թեքնիք գրասենեակին: Ներկայ էին Պուրճ Համուտի քաղաքապետ Մարտիկ Պօղոսեան, ներքին գործոց նախարարի ներկայացուցիչ, տեղական ինքնակառավարման մարմիններու վարչութեան տնօրէն Ֆաթեն Ապու Հըսըն, ՄԱԿ-ի Բարգաւաճման ծրագիրի (Եու. Էն. Տի. Փի.) շրջանային տնօրէն Մելանի Հաունշթայն, ՄԱԿ-ի բնակավայրերու ծրագիրի (Եու. Էն. Հապիթաթ) շրջանային տնօրէն Թայնա Քրիսթընսըն, քաղաքապետութիւններուն օժանդակելու ծրագիրի (ՄԵՐՓ) տնօրէն Մարայա Տը Ուին, Եւրոպական Միութեան դեսպանատան գործակցութեան բաժանմունքի փոխվարիչ Ալիսիա Սքուարչելլա եւ այլ պաշտօնատարներ:

Եւրոպական Միութեան ֆինանսաւորումով եւ ՄԱԿ-ի գործակալութիւններուն օժանդաութեամբ հիմնուած այս գրասենեակին նպատակն է օժանդակել տեղական իշխանութիւններուն, որպէսզի կարենան դիմագրաւել ընկերային ու տնտեսական մարտահրաւէրները, ինչպէս նաեւ բարելաւել իրենց շրջանի բնակչութեան մատուցուած հիմնական ծառայութիւնները:

Գրասենեակը, բարձրագոյն պատրաստութեամբ մասնագէտներով եւ արդի արհեստագիտութեամբ օժտուած, կ՛օժանդակէ քաղաքապետութեան զարգացնելու իր գործելաձեւը, բարելաւելու աշխատանքներու ծրագրումի եւ գործադրութեան գործընթացները, ինչպէս նաեւ ընդարձակելու շրջանի բնակչութեան մատուցուած հիմնական ծառայութիւններու ծիրն ու որակը:

Պուրճ Համուտի քաղաքապետ Մարտիկ Պօղոսեան այս առիթով արտասանուած իր խօսքին մէջ հիւրերը ողջունելէ ետք նկատել տուաւ, որ այսօր Լիբանան, իր ժողովուրդը, պետութիւնն ու հաստատութիւնները աննախընթաց դժուարութիւններ կը դիմագրաւեն:

Միւս կողմէ, ան հաստատեց, որ ընկերային զարգացումը, գործելաձեւի եւ արհեստագիտութեան մէջ յառաջդիմութիւնները շատոնց անհրաժեշտ դարձուցած էին բարելաւել տեղական ինքնակառավարման մարմիններու աշխատանքը, որպէսզի Լիբանանի քաղաքապետութիւններուն աշխատանքը պատշաճի 21-րդ դարու կարիքներուն եւ տուեալներուն: Բայց Լիբանանի օրէնքները, կանոնները եւ քաղաքապետութիւններուն նիւթական միջոցները թոյլ չէին տար, որ անոնք ներգրաւեն բարձր պատրաստութեամբ մարդուժ եւ արդի արհեստագիտութիւն:

Թեքնիք գրասենեակի ստեղծումը եկաւ լուծելու այդ հարցերուն մէկ մասը, եւ այդ գրասենեակին շնորհիւ Պուրճ Համուտի քաղաքապետութիւնը կրցաւ յառաջ տանիլ բազմաթիւ նախաձեռնութիւններ ու ծրագիրներ, ըսաւ ան, նկատել տալով, որ այդ գրասենեակին անձնակազմը սերտօրէն առնչուեցաւ շրջանի նորոգութեան եւ բարեզարդման նախաձեռնութիւններու ծրագրումի եւ գործադրութեան աշխատանքներուն հետ:

Պուրճ Համուտի քաղաքապետը շնորհակալութիւն յայտնեց գրասենեակը ֆինանսաւորած Եւրոպական Միութեան եւ այս ծրագիրը գործադրած ՄԵՐՓ-ի աշխատակազմին (Եու. Հապիթաթի եւ «Եու. Էն. Տի. Փի.»-ի միացեալ խմբակ): Ան իր խօսքը եզրափակեց մաղթելով, որ Պուրճ Համուտի քաղաքապետութեան հետ անոնց գործակցութիւնը շարունակուի եւ ընդարձակուի:

Ներքին գործոց նախարարի ներկայացուցիչ Ապու Հըսըն իր խօսքին մէջ հաստատեց այսպիսի գրասենեակներու անհրաժեշտութիւնն ու դերը: Ան նաեւ հաւաստեց տեղական մարմիններու վարչութեան պատրաստակամութիւնը ամէն ձեւով օժանդակելու անոնց եւ քաղաքապետութիւններուն` ընդգծելով, որ քաղաքապետութիւնները հիմնական դերակատարութիւն ունին տեղական բարգաւաճումին մէջ:

ՄԱԿ-ի բնակավայրերու ծրագիրի շրջանային տնօրէն Թայնա Քրիսթընսըն ներկայացուց թեքնիք գրասենեակներու հիմնադրութեան նպատակը` նեցուկ կանգնիլ քաղաքապետութիւններուն եւ զանոնք օժտել անհրաժեշտ միջոցներով, որպէսզի կարենան բարելաւել իրենց քաղաքները:

ՄԱԿ-ի բարգաւաճման ծրագիրի շրջանային ներկայացուցիչ Մելանի Հաունշթայն ողջունեց այս ծրագիրին իրականացման նպաստած բոլոր կողմերուն ներդրումը` նշելով, որ ծրագիրը նաեւ աջակցած է Պուրճ Համուտի քաղաքապետութեան թէժ գիծի ստեղծումին` արագ ընդառաջելու համար բնակչութեան կարիքներուն:

Լիբանանի մէջ Եւրոպական Միութեան ներկայացուցչութեան գործակցութեան բաժանմունքի փոխվարիչ Ալիսիա Սքուարչիլլա յայտնեց, որ միութիւնը «Մատատ» հիմնադրամի միջոցով սատար կը կանգնի այս եւ նման նախաձեռնութիւններու, որոնց նպատակն է յաւելեալ կարելիութիւն ընձեռել քաղաքապետութիւններուն` դիմագրաւելու մարտահրաւէրները, զարկ տալու վերականգնումին ու բարգաւաճումին եւ բարելաւելու բնակչութեան ընկերային ու տնտեսական պայմանները:

Ասուլիսի աւարտին ցուցադրուեցաւ թեքնիք գրասենեակներու աշխատանքներուն մասին տեսերիզ մը: