12.09c
Երեվան
հնգ, փտր 26
Արցախի Հանրապետութեան պետական նախարար, արագ արձագանգման (օպերատիւ) շտաբի պետ Ռուբէն Վարդանեանի ղեկավարութեամբ, 28 դեկտեմբերին, տեղի ունեցած օպերատիւ շտաբի նիստին քննարկուած է եւ հաւանութիւն տրուած է հանրային սնունդի ծառայութիւններու մատուցման սահմանափակումներու սահմանման վերաբերեալ Արցախի Հանրապետութեան կառավարութեան որոշման նախագծին: Նշուած է, որ որոշումը կայացուած է՝ հաշուի առնելով Ատրպէյճանի կողմէ Արցախի շրջափակման հետեւանքով ստեղծուած իրավիճակին մէջ սննդամթերքի սղութիւնը եւ ելեկտրականութեան խնայողութիւնները:
Պետական նախարար Ռուբէն Վարդանեան տեղեկացուցած է, որ ոլորտի պատասխանատուներու հետ երէկ հանդիպում ունեցած է տնտեսվարողներու հետ՝ քննարկելու համար սահմանափակումներու կիրառման նպատակայարմարութիւնը եւ ողջունելի համարած է վերջիններուս կողմէ ցուցաբերուած լիակատար փոխըմբռնումն ու աջակցութիւնը: Անոնցմէ շատերը արդէն իսկ չեղարկած են բազմամարդ հանդիսութիւնները՝ այս իրավիճակին մէջ ատոնք ոչ նպատակայարմար համարելով: Պետական նախարարը յանձնարարած է պատասխանատուներուն հանդիպման ընթացքին տնտեսվարողներու կողմէ եղած առաջարկները հաշուի առնել կառավարութեան որոշման նախագիծին մէջ:
Նիստի ընթացքին անդրադարձ եղած է նաեւ կանխիկ դրամաշրջանառութեան վերաբերեալ իրավիճակին: Զեկուցուած է, որ հանրապետութեան մէջ առկայ է կանխիկ գումարի բաւարար ծաւալ, պարզապէս իրավիճակով պայմանաւորուած՝ կազմակերպութիւններն ու անհատ անձինք սկսած են աւելի շատ դրամ կանխիկացնել եւ չծախսել այն, որ կ'անդրադառնայ կանխիկի շրջանառութեան ծաւալներու վրայ: Պետական նախարարը նկատած է, որ ստեղծուած պայմաններուն մէջ շատ աւելի ճիշդ է գումարը պահել անկախիկ եղանակով, եւ յանձնարարած է իրազեկման համապատասխան աշխատանքներ իրականացնել:
Նիստի ընթացքին զեկուցուած է պարէնային ապրանքներու, դեղորայքի, պենզինի եւ վառելիքի շուկաներուն մէջ ընթացիկ իրավիճակը: Ներկայացուած են ուժանիւթի մատակարարման, ջրամատակարարման եւ ենթակառուցուածքներու անխափան աշխատանքն ապահովելու ուղղութեամբ իրականացուող քայլերը:
