16.09c
Երեվան
երք, հնս 24
Հայաստանի անդամակցութիւնը Միջազգային քրէական դատարանին անոր ինքնիշխան գործն է, յայտարարած է Ռուսիոյ նախագահի մամուլի քարտուղար՝ Տմիթրի Փեսքով, աւելցնելով, որ Մոսկուայի համար կարեւոր է, որ այդ բացասաբար չանդրադառնայ երկկողմ յարաբերութիւններու վրայ:
«Այստեղ մեկնաբանելու ոչինչ կայ։ Ընդհանուր առմամբ, այդ Հայաստանի ինքնիշխան իրաւունքն է: Բայց միւս կողմէ` մեզի համար կարեւոր է, որ նման որոշումները բացասաբար չանդրադառնան ե՛ւ տէ եուրէ (ըստ օրէնքի), ե՛ւ տէ ֆաքթօ (փաստացի) մեր յարաբերութիւններու վրայ, որոնք մենք կը փայփայենք եւ կը ձգտինք զարգացնել»,- լրագրողներու հետ զրոյցին ընդգծած է Քրեմլի խօսնակը:
Նշենք, որ Հայաստանը, 1 Փետրուարին, պաշտօնապէս դարձաւ Միջազգային քրէական դատարանի անդամ։ 2023 թուականի Նոյեմբերին Միջազգային քրէական դատարանը յայտարարած էր, որ Հայաստան 1, Փետրուար, 2024 թուականին պիտի դառնայ Հռոմի կանոնադրութեան միացած 124-րդ պետութիւնը եւ Արեւելեան Եւրոպայի խումբէն 19-րդ պետութիւնը։
Ազգային ժողովը Հռոմի կանոնադրութիւնը վավերացուցած էր 2023 թուականի հոկտեմբեր 3-ին։
