1.09c
Երեվան
կրկ, դկտ 22
Արցախպրես-«Աննա Աստվածատուրյան» հիմնադրամը «Սեր Արցախ» բարեգործական նախագծի շրջանակներում նվեր-տուփերի հերթական խմբաքանակն է պատրաստում Արցախում ծնված երեխաների համար:
«Ծրագիրը մեկնարկել է 2022 թվականի հունիսի 1-ից: Այս ընթացքում հասցրել ենք 1500 արցախցի ընտանիքների նվեր-տուփեր տրամադրել: Դրանցում, ինչպես նախկինում, այնպես էլ այժմ, ներառված են դեղատնային պարագաներ, հագուստ եւ մեր խորհրդանշական ծիտիկը: Չնայած այս ընթացքում հանդիպած դժվարություններին, կարողացել ենք պահպանել ծրագրի շարունակականությունը: Եթե ծննդատանը չենք հասցրել նվերները հանձնել մայրիկներին, ապա մի քանի օրից նրանք արդեն տանն են ստացել այն: Մենք, հավատարիմ մեր որդեգրած սկզբունքներին եւ ի դեմս հիմնադրամի ղեկավարի, փորձում ենք ամեն ինչ անել, որ ծրագիրը շարունակվի»,-մանրամասնել է Ա.Վարդանյանը՝ հավելելով, որ անհրաժեշտ միջոցները ձեռք են բերվում հիմնադրամի կազմակերպած դրամահավաքների միջոցով:
Նվեր-տուփերի մեջ հիմնականում հայկական արտադրության պարագաներ են:
«Մեր նպատակներից է նաև նպաստելը հայրենական արտադրության խթանմանը: Տուփերում ներառվող հագուստը հայաստանյան «Լալունց» ֆիրմայի արտադրանքն, որի հետ համագործակցում ենք առաջին օրվանից, խաղալիքն արցախյան, իսկ դեղատնային պարագաները եվրոպական են»,-նշել է հիմնադրամի ներկայացուցիչը:
Ներկայումս 400 նվեր-տուփ են պատրաստում, որը կբավականացնի, որպեսզի նվիրեն ինչպես այն մայրիկներին, որոնք դեռ չեն ստացել, այնպես էլ այն բալիկներին, որոնք կծնվեն առաջիկա երկու ամիսներին:
«Ինչ էլ լինի՝ մենք կանք, ապրում ենք Արցախում, պայքարում մեր վաղվա օրվա համար: Ես կոչ եմ անում Սփյուռքի մեր բոլոր հայրենակիցներին՝ հնարավորություն սահմաններում օգնելու Աննա Աստվածատուրյան հիմնադրամին, սատար կանգնելու, որպեսզի ծրագիրը շարունակական լինի: Նպատակ ունենք այն իրականացնել Սյունիքի, Տավուշի մարզերում և ինչու չէ, նաև ամբողջ Հայաստանում»,-ընդհանրացրել է հիմնադրամի ներկայացուցիչը:
