21.09c
Երեվան
երկ, սպտ 16
«ՈւԺԻ ԳՈՐԾՕՆ» հաղորդման այս թողարկման Հայկ Սահակեանը Հայաստանի եւ Թուրքիոյ յատուկ ներկայացուցիչներու՝ Վիեննայի մէջ կայացած 3-րդ հանդիպման, անոր եւ Հայաստանի մէջ ընթացող բողոքի շարժումներուն վերաբերեալ թրքական մամուլի մէջ առկայ արձագանգներուն, ՀՀ ԱԽ քարտուղարի եւ Ատրպէյճանի նախագահի հանդիպման, ինչպէս նաեւ Հայաստան-Ատրպէյճան խաղաղութեան պայմանագրին վերաբերեալ այս շաբաթ հնչած յայտարարութիւններուն անդրադարձած է։
Թրքական իշխանամերձ այնպիսի լրատուամիջոցներ, ինչպիսիք են «Sabah»-ը, «Yeni Şafac»-ը, «Hyurriet»-ը, «Milliyet»-ը, ինչպէս նաեւ տարբեր հեռուստաընկերութիւններ աշխուժօրէն կը լուսաբանեն Երեւանի մէջ ընթացող բողոքի զանգուածային գործողութիւնները։ Պետական «Anadolu» գործակալութիւնը հայ-թրքական յարաբերութիւններու կարգաւորման գործընթացին վերաբերեալ թրքերյնով վերլուծութիւն մը հրապարակած է, որուն հեղինակ, թուրք քաղաքագէտ Արմաղան Կէօզքամանը անդրադարձած է տարածաշրջանային իրավիճակին, այն նախադրեալներուն, որոնց ազդեցութեամբ մեկնարկած են բանակցութիւնները։
Ուշագրաւ է հեղինակին այն միտքը, որ Հայաստանի վարչապետ Նիկոլ Փաշինեանը Հայոց ցեղասպանութիւնը ճանչնալու հարցը որպէս բանակցութիւններուն մէջ յառաջընթաց ապահովելու պայման չէ ներկայացուցած Թուրքիոյ, եւ այդ պատճառով է, որ թրքական կողմը համաձայնած է բանակցութիւններ սկսիլ յարաբերութիւններու կարգաւորման ուղղութեամբ։ Բայց այժմ, ըստ յօդուածագրի, բանակցութիւններու հետագայ ընթացքը կրնայ վտանգուիլ, եթէ Հայաստանի մէջ բողոքի ալիքի ազդեցութեամբ իշխանափոխութիւն ըլլայ։
