30.09c
Երեվան
ուրբ, սպտ 25
Հայաստանի մէջ կը սպասեն հակամարտութեան հետեւանքով Ատրպէյճանի մէջ անազատութեան մէջ յայտնուած հայերու վերադարձին: Այս մասին ՄԱԿ-ի Ընդհանուր Ժողովի 81-րդ նստաշրջանին իր ելոյթի ժամանակ ըսած է ՀՀ վարչապետ Նիկոլ Փաշինեանը:
«Հայաստանի եւ Ադրբեջանի յարաբերութիւններում լուծման կարիք ունեն մի քանի հազար անհետ կորածների ճակատագրի պարզաբանումը, որի շուրջ համագործակցելու պայմանաւորուածութիւն ենք ձեռք բերել Ադրբեջանի հետ։ Հայաստանը պատրաստ է շարունակել եւ խորացնել համագործակցութիւնը Ադրբեջանի հետ՝ ականազերծման հարցում։ Եւ ի հարկէ, Հայաստանի Հանրապետութիւնում սպասում են հակամարտութեան հետեւանքով Ադրբեջանում անազատութեան մէջ յայտնուած հայերի վերադարձին։
Այս հարցերի դեռեւս չլուծուած լինելու հետ մէկտեղ՝ յոռետեսներին սնող միւս պատճառը ժամանակ առ ժամանակ Հայաստանի եւ Ադրբեջանի որոշակի շրջանակներում, երբեմն պաշտօնական մակարդակում, կոնֆլիկտային խօսոյթների օգտագործումն է։ Կարծում եմ մենք՝ նկատի ունեմ Հայաստանն ու Ադրբեջանը, աւելի քան բաւարար արդիւնքների ենք հասել, որոնք մեզ համար պիտի աւելի արժէքաւոր լինեն, քան կոնֆլիկտային խօսոյթների օգտագործումը՝ լինի դա պատմութեան, թէ պատմամշակութային յուշարձանների կամ որեւէ այլ բանի մասին։
Խաղաղութեան մասին հոգ տանելը, այն ամրապնդելն ու ինստիտուցիոնալ դարձնելը Հայաստանի եւ Ադրբեջանի միջեւ համագործակցութեան հիմնական թեման պէտք է լինի։ Արդէն երկուսուկէս տարի Հայաստանի եւ Ադրբեջանի միջեւ փոխհրաձգութեան հետեւանքով զոհեր եւ վիրաւորներ չկան, եւ սա, կարծում եմ, այն մեծագոյն արժէքն է, որը ստեղծուել է վերջին տարիների համագործակցութեամբ։
Անկախ Հայաստանի եւ անկախ Ադրբեջանի յարաբերութիւններում նախկինում երբեք այսպիսի ժամանակաշրջան չենք ունեցել, չնայած հայերն ու ադրբեջանցիները խաղաղ գոյակցութեան դարերի փորձ ունեն։
Մեր խնդիրը, սակայն, պատմական այդ փորձը վերականգնելը չէ, այլ ժողովրդական այդ փորձի հիման վրայ միջպետական յարաբերութիւններ կառուցելը՝ հիմնուած միմեանց տարածքային ամբողջականութեան, ինքնիշխանութեան եւ քաղաքական անկախութեան յարգման վրայ։ Սա, ի դէպ, ճշգրիտ այն խօսոյթն է, որ Հայաստանն ու Ադրբեջանն արդէն իսկ համաձայնեցրել եւ նախաստորագրել են՝ երկու երկրների միջեւ խաղաղութիւն եւ միջպետական յարաբերութիւններ հաստատելու մասին համաձայնագրում։
Վաշինգտոնի խաղաղութեան գագաթնաժողովում նախաստորագրուած այդ համաձայնագիրը ստորագրելն ու վաւերացնելը Հայաստանի եւ Ադրբեջանի համատեղ օրակարգի յաջորդ խոշոր թեման է, եւ մենք հետեւողականօրէն շարունակելու ենք աշխատանքն այս ուղղութեամբ»,-ըսած է Փաշինեանը իր ելոյթին մէջ:
