image

Գերագոյն Հոգեւոր Խորհուրդէն յորդոր՝ իշխանութիւններուն

Գերագոյն Հոգեւոր Խորհուրդէն յորդոր՝ իշխանութիւններուն

Մայիսի 23-ին Մայր Աթոռ Սուրբ Էջմիածնում, նախագահութեամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի, տեղի ունեցաւ Գերագոյն Հոգեւոր Խորհրդի ժողով, որին մասնակցեցին նաեւ Մայր Աթոռի վանաբնակ եպիսկոպոսները: Ժողովի ընթացքում քննարկուեցին Հայաստանի եւ Արցախի առջեւ ծառացած մարտահրաւէրները, ինչպէս եւ անդրադարձ եղաւ հայ-ադրբեջանական բանակցային գործընթացի առնչութեամբ օրերս կատարուած յայտարարութիւններին: 

Գերագոյն Հոգեւոր Խորհուրդը հանդէս եկաւ յայտարարութեամբ.

«Հայաստանի ու Արցախի ազատ ու անկախ կեանքի տեսլականը վերջին երեք ու կէս տասնամեակների ընթացքում իրականութիւն է դարձել աշխարհասփիւռ մեր ժողովրդի հերոսական պայքարի, զոհողութիւնների ու յանձնառութիւնների շնորհիւ: Հայրենեաց պաշտպան մեր նահատակ զաւակների սխրանքն ու լուսավառ օրինակը ամուր են պահել մեր ժողովրդի ոգին` դիմակայելու ամէն նեղութեան, շարունակելու հայրենի հողի վրայ իր պատմական ներկայութիւնը: 

Արցախեան 44-օրեայ պատերազմի ողբերգական հետեւանքները մեր հայրենիքը կանգնեցրեցին անվտանգային նոր մարտահրաւէրների, գոյաբանական սպառնալիքի առջեւ, սակայն նոյնիսկ այդ բարդ իրավիճակում չնուազեց մեր ժողովրդի եւ ազգային հաստատութիւնների նախանձախնդրութիւնը` շարունակելու պաշտպանել Հայաստանի ու Արցախի արդար իրաւունքները:

ՀՀ վարչապետ Նիկոլ Փաշինեանի մայիսի 22-ի ասուլիսի ընթացքում հնչած յայտարարութիւնները բացայայտեցին հանրութեանը մատուցուող խաղաղութեան օրակարգի իրական բովանդակութիւնը, որով ակնյայտ են դառնում Արցախի յետագայ ճակատագրի եւ Հայաստանի սահմանամերձ որոշակի տարածքների առնչութեամբ ՀՀ բանակցային գործընթացում իշխանութիւնների որդեգրած վտանգաւոր ու մերժելի դիրքորոշումները:

Գերագոյն Հոգեւոր Խորհուրդը դատապարտելի եւ անընդունելի է նկատում խաղաղութեան պատրուակով «հիմնաւորուողէ միակողմանի զիջումները: Ձեռնարկուող անհեռատես քայլերով, Արցախի Հանրապետութիւնը Ադրբեջանի կազմում ճանաչելով` Հայաստանի իշխանութիւնները Արցախի մեր քոյրերին ու եղբայրներին անխուսափելիօրէն կը կանգնեցնեն նոր ցեղասպանութեան եւ հայրենազրկման առջեւ: Մեր զաւակների արեան գնով ու մաքառումով կերտուած Արցախի անկախութիւնը, Հայաստանի տարածքները ենթակայ չեն սակարկութիւնների: Հայրենիքը ամէնքինս է, եւ հայրենիքին առնչուող նման որոշումները պէտք է կայացուեն ՀՀ Սահմանադրութեան հիմնարար դրոյթներին եւ օրէնսդրութեանը համահունչ եւ ոչ` առանձին քաղաքական խմբերի ու խմբաւորումների հայեցողութեամբ:

Յորդորում ենք իշխանութիւններին` հրաժարուել պարտուողական մտայնութիւնից եւ դրանից բխող կործանարար քայլերից, համազգային մարտահրաւէրների յաղթահարման համար գտնել խելամիտ ու արժանապատիւ լուծումներ: Մեր կոչն ենք ուղղում համայն մեր ժողովրդին, ազգային կառոյցներին օրհասական այս պահին ողջախոհութեամբ սթափ գնահատելու ստեղծուած բարդ կացութիւնը եւ աննահանջ ու միաբան մնալու մեր համազգային շահերի, Արցախի ինքնորոշման իրացուած իրաւունքի հետապնդման գործում: Այս հարցում անհրաժեշտ ենք նկատում մեր ժողովրդի վճռական կամարտայայտութիւնը: 

Խաղաղութիւն մեր հայրենիքին, ապահով ու անվտանգ կեանք համայն մեր ժողովրդին ի Հայաստան, յԱրցախ եւ ի սփիւռս»: