14.22c
Երեվան
չրք, ապր 08
Քանի մը երկիրներ, որոնց շարքին՝ Եգիպտոսը, Իրաքը, Ճափոնը, Ինդոնեզիան, Մալեզիան, ինչպէս նաեւ Օմանը, Ուքրանիան, Աւստրալիան եւ Նոր Զելանտան, ողջունած են Միացեալ Նահանգներու եւ Իրանի միջեւ երկշաբաթեայ զինադադարի մասին համաձայնութիւնը։ Այս մասին կը հաղորդէ Al Jazeera-ն։
Եգիպտոսի Արտաքին գործոց նախարարութիւնը յայտարարութեան մէջ նշած է, որ Փաքիստանի եւ Թուրքիոյ հետ համատեղ պիտի շարունակէ ջանքերը՝ «շրջանին մէջ անվտանգութիւնն ու կայունութիւնը ամրապնդելու համար»։
Նոր Զելանտայի արտաքին գործոց նախարար Ուինսթըն Փիթըրսը X-ի մէջ գրած է. «Թէեւ ասիկա խրախուսական լուր է, սակայն առաջիկայ օրերուն տակաւին զգալի աշխատանք կայ ընելու՝ երկարատեւ զինադադար ապահովելու համար»։
The Associated Press-ի հաղորդմամբ՝ Մեծ Բրիտանիոյ վարչապետ Քիր Սթարմըրը Ապրիլ 8-ին պիտի մեկնի Պարսից ծոց՝ աջակցելու նոր յայտարարուած զինադադարին եւ Իրանի դէմ ԱՄՆ-Իսրայէլ պատերազմը դադրեցնելու աւելի լայն ճիգերուն։
«Զինադադարը պահ մը թեթեւացում պիտի բերէ շրջանին եւ աշխարհին, սակայն այն պէտք է վերածուի երկարատեւ համաձայնագրի»,– ըսած է Սթարմըր։
Ուքրանիոյ արտաքին գործոց նախարար Անտրէյ Սիպիհան կոչ ուղղած է Ուաշինկթընին նման «վճռականութիւն» ցուցաբերելու Ուքրանիոյ մէջ Ռուսիոյ պատերազմը դադրեցնելու հարցով։
Գերմանիոյ վարչապետ Ֆրիտրիխ Մերցը շեշտած է, որ առաջիկայ օրերուն նպատակը պէտք է ըլլայ դիւանագիտական միջոցներով «պատերազմի երկարատեւ դադրեցման» շուրջ բանակցութիւնները։
