24.09c
Երեվան
շբթ, ապր 20
Արցախեան պատերազմին մասնակցած ու ռազմի ճակատներէն Երեւան յաղթանակած վերադարձած Աբրահամ Արծիւեանի երազը օրերս իրականացաւ։
Հալէպահայ մեր հայրենակիցը ( 1995-ի ծնունդ) իր ընտրեալին ՝ Գարինա Մարտիրոսեանին հետ Սուրբ Խորանի առաջ կանգնելով ընտանեկան բոյն մը հիմնեց։
Հարազատներու, եւ բարեկամներու լայն շրջանակին առջեւ Աբօն եւ Գարինան իրար այո ըսին եւ խոստացան հակառակ ամէն տեսակի դժուարութեանց իրենց կեանքը շարունակել հայրենի երկինքին ներքոյ։
Նշենք, որ Աբրահամը հանրային կառավարման ոլորտի մասնագէտ է, իսկ անոր կողակիցը՝ Գարինան գինեգործութեան մասնագիտութիւն ստացած է։
Երկու երիտասարդները առաջին անգամ իրար հանդիպած էին 2019 թուականին եւ ահա ծանօթութենէն երկու տարի անց ուխտեցին իրենց կեանքը միասին շարունակել։
Կեանք՝ յանուն պայքարի, խաղաղ երկինքի եւ անվտանգ ու բարօր հայրենիքի։
Աբրահամի եւ իր տիկնոջ ՝ Գարինայի երազը նաեւ մեր բոլորի երազանքն է, որովհետեւ Արցախի պատերազմէն յետոյ ամբողջ հայութեան համար ոգի եւ կամք ներշնչող մեծագոյն երեւոյթը նոր հայ ընտանիքներու կազմութիւնն է։
