25.09c
Երեվան
երք, հլս 08
Արցախի ու Հայաստանի ուղղութեամբ վերջին օրերուն նկատուող ատրպէյճանական աշխոյժութիւնը, որ կ'արտայայտուի հրադադարի ռեժիմի տարբեր բնոյթի խախտումներով, ունի տարբեր պատճառներ։ Այս թեմայով քանի մը դիտարկումներ։ Այս մասին դիմատետրի իր էջին գրած է ԱԺ «Պատիւ ունեմ» խմբակցութեան պատգամավոր Տիգրան Աբրահամեանը:
Ան նաեւ նշած է.
«1. Յետպատերազմական ժամանակահատուածին կողմերը նոր բնագծեր են ձեւաւորում, իսկ դա ենթադրում է տեղերում բարենպաստ դիրքերում տեղակայուելու մրցավազք։
Մեծ առումով Ատրպէյճանը պատերազմից անմիջապէս յետոյ, օգտուելով ՀՀ իշխանութիւնների քաղաքական թողտւութիւնից եւ լռութիւնից իր հիմնական խնդիրը լուծել է՝ գլխաւոր ուղղութիւններով ստանալով մարտավարական եւ ռազմավարական առաւելութիւն։ Կան որոշ ուղղութիւններ, որտեղ դիրքային պայքարը դեռ ընթանում է, ինչը ուղեկցւում է իրադրային փոփոխութիւններով։
2. Ատրպէյճանն օգտագործում է իր դիրքային առաւելութիւնները եւ անընդհատ յիշեցնում ՀՀ իշխանութիւններին, որ խոստացածն ու բանաւոր/գրաւոր պայմանաւորուածութիւնները չկատարելու դէպքում ուժի կիրառումը տարբեր մասշտաբներով կրկին առաջին փլան կը գայ։
3. Ինժեներական աշխատանքների, այսպէս ասած, սեզոնային բնոյթով պայմանաւորուած, առաջնագծում աշխոյժութիւնը մեծացել է, ինչն անխուսափելիօրէն բերում է տարբեր բնոյթի սրացման։
4. Ատրպէյճանը մեր զինուած ուժերի ցանկացած շարժ՝ ներքին վերադասաւորումներից մինչեւ առաջնագծի ենթակառուցուածքային փոփոխութիւն, դիտում է որպէս ռեւանշի փորձ ու ցոյց տալիս, որ դա ամէն գնով պատրաստ է կասեցնելու։
5. Ատրպէյճանն անընդհատ յիշեցնում է, որ պատերազմը չի աւարտուել, իր յաւակնութիւնները շատ հեռու են բաւարարուած լինելուց եւ անկախ ՀՀ իշխանութիւնների զիջողական քաղաքականութիւնից, ճնշումները շարունակուելու են, իսկ ՀՀ-ի իշխանութիւնների դէմ դրուող պահանջներն ընդլայնուելու»։
