27.09c
Երեվան
շբթ, սպտ 26
Իրանը Միացեալ Նահանգներուն ներկայացուցած է եօթնօրեայ հրադադարի ծրագիր, որուն նպատակն է վերականգնել նաւագնացութիւնը Հորմուզի նեղուցով։ Սակայն ԱՄՆ նախագահ Տանըլտ Թրամփ մերժած է առաջարկը եւ չէ բացառած ռազմական գործողութիւններու վերսկսումը, գրած է «The Wall Street Journal»-ը։
Իրանի արտաքին գործոց նախարար Ապպաս Արաքչի աւելի վաղ ՄԱԿ-ի մէջ լրագրողներուն յայտնած էր, որ Թեհրան խաղաղութեան ծրագիրը փոխանցած է Քաթարի միջոցով։ Անոր խօսքով՝ համաձայնագիրը կը նախատեսէր եօթնօրեայ ժամկէտի հաշուարկ, որուն հետեւանքով պիտի բացուէր Հորմուզի նեղուցը եւ դադրեցուէին տարածաշրջանին մէջ ռազմական գործողութիւնները։
«Եթէ ամերիկեան կողմէն առկայ է համաձայնութեան հասնելու եւ Հորմուզի նեղուցը բանալու լուրջ մտադրութիւն, ապա ատոր համար այժմ ամէն ինչ պատրաստ է»,– յայտարարած է Արաքչի։
Այնուամենայնիւ, «The Wall Street Journal»-ը, վկայակոչելով ամերիկացի անանուն պաշտօնեաներ, հաղորդած է, որ Թրամփ մերժած է Իրանի առաջարկը եւ իր խորհրդականներուն ըսած, որ կ՚ակնկալէ ռմբակոծութիւններու վերսկսում՝ Նոյեմբերին նախատեսուած Քոնկրէսի ընտրութիւններէն ետք։
ԱՄՆ նախագահը նաեւ «Truth Social» ընկերային հարթակին վրայ հրապարակած է Հորմուզի նեղուցի քարտէզը՝ շրջագծելով տարածքը եւ պատկերը մակագրելով «Թրամփի նեղուց» (Trump’s Strait) անունով։
Այս շաբաթ ՄԱԿ-ի ամպիոնէն ելոյթ ունենալու ժամանակ Թրամփ յայտարարած է, որ կարեւոր որոշման մը առջեւ կանգնած է՝ ոչնչացնե՞լ Իրանը, թէ՞ համաձայնութեան գալ անոր հետ։
