13.09c
Երեվան
հնգ, հնս 19
«Քովիտ» համավարակի օրերուն մահացած բնիկ պոլսեցի` Պսակ Վրդ. Հաթապեանի մարմինը հողին յանձնուեցաւ Լոնտոնի մէջ։
Տխուր եղելութեան մասին «Արեւելք» իմացաւ Պոլսոյ Հայոց Պատրիարքութեան էջէն։
Ստորեւ տրուած լրատւութիւնը։
Լոնտոնի մէջ կատարուեցաւ Պատրիարքական Աթոռոյս հոգելոյս միաբան՝ Պսակ Վրդ. Հաթապեանի վերաթաղման հանդիսութիւնը։
Մեծն Բրիտանիոյ եւ Իրլանտայի Հայոց Թեմի Առաջնորդ Գերշ. Տ. Յովակիմ Եպս. Մանուկեան 10 Յունիս 2025, Երեքշաբթի, Լոնտոնի Ս. Սարգիս Եկեղեցւոյ մէջ նախագահեց հոգելոյս Պսակ (Ստեփան) Վրդ. Հաթապեանի վերաթաղման արարողութեան։
Արարողութեան մասնակցեցան Հոգեւորականաց դասը, հաւատացեալներ, ընտանիքի անդամներ եւ համայնքի ներկայացուցիչներ։
Հայր Պսակ Վրդ. իր հոգին աւանդեց Յունիս 2021ին, COVID-19 համավարակի ամենադժուարին օրերուն, երբ կարելի չեղաւ պատշաճ եկեղեցական յուղարկաւորութիւն կազմակերպել։
Չորս տարի անց՝ 10 Յունիս 2025ին, Ս. Եկեղեցին կատարեց իր սրբազան պարտականութիւնը եւ հոգելոյս Հայր Սուրբը վերաթաղուեցաւ լիարժէք պատիւներով՝ Ս.
Սարգիս եկեղեցւոյ մէջ՝ իր մօր կողքին։
Դամբանականին ընթացքին, Գերշ. Սրբազան Հայրը ըսաւ․ «Այսօր հաւաքուած ենք յարգանքով եւ խոկումով՝ յիշատակելու Հայ Եկեղեցւոյ հաւատարիմ սպասաւոր մը։ Հայր Պսակը կը վերադառնայ իր հողին արժանավայել հանգիստով։ Թող Քրիստոս՝ Բարի Հովիւը, զինք ընդունի յաւիտենական լոյսին եւ խաղաղութեան մէջ, ուր չկայ ցաւ, վիշտ կամ բաժանում, այլ միայն անսահման ուրախութիւն՝ Աստուծոյ ներկայութեան մէջ»։
Սրբազան Հայրը փոխանցեց նաեւ Ն.Ա.Տ. Սահակ Բ. Պատրիարք Հօր օրհնութիւններն ու աղօթքները, որ յատուկ գնահատանքով յիշեց Հայր Պսակը որպէս լուռ եւ հաւատարիմ եկեղեցական։
Յատուկ երախտագիտութիւն յայտնուեցաւ Ալեքսանտրա Սարգիսին, որուն աշխատանքն ու անկեղծ նուիրումը կարելի դարձուցին սոյն վերաթաղումը՝ տալով անոր այն պատիւը, որուն ան արժանի էր։
Ներկաներուն շարքին էր նաեւ Ճաք Չատըրճեան, հայր Պսակի զարմիկը, որ Գանատայէն ժամանած էր իր ընտանիքով։ Ան ջերմօրէն կիսեց ընտանեկան յիշողութիւններ եւ խօսեց անոր մանկութեան տարիներուն, բնաւորութեան եւ ընտանեկան արժէքներու մասին։
Յուղարկաւորութենէն յետոյ, տեղի ունեցաւ հոգեճաշ։ Հայր Պսակը ծնած է 1945ին, Ստանպուլ։ Հոգեւոր կրթութիւնը ստացած է Սկիւտարի Ս. Խաչ Դպրեվանքի մէջ։ 1970-ին ձեռնադրուած է կուսակրօն քահանայ՝ ձեռամբ Շնորհք Պատրիարքի։ 1973ին ուղարկուած է Լոնտոն՝ ուսանելու հոգեբանութիւն Լոնտոնի համալսարանի մէջ, միաժամանակ ծառայելով Ս. Սարգիս եւ Մենչըսթըրի Ս. Երրորդութիւն եկեղեցիներուն մէջ։
Հայր Պսակը խաղաղասէր, ամփոփ եւ խոկացի հոգեւորական մըն էր։ Իր ներաշխարհը կ’արտայայտէր նամակագրութեամբ եւ իր պարզ ու աղօթաշատ կեանքը եղած է հաւատքի կենդանի վկայութիւն բոլոր անոնց համար, որոնք ճանչցած են զինք։
Յիշատակն արդարոց օրհնութեամբ եղիցի։
