22.09c
Երեվան
երք, հնս 24
Իսրայէլի եւ Իրանի միջեւ հրադադարի համաձայնագիրը ձեռք բերուած է Քաթարի եւ ԱՄՆ-ի միջնորդութեամբ։
«Արմէնփրէս»-ի հաղորդմամբ՝ այս մասին յայտնած է Axios-ը։
Քաթարի մէջ ԱՄՆ ռազմակայանի վրայ Իրանի յարձակումէն ետք, Իրան հաղորդագրութիւն ուղարկած է Սպիտակ Տուն՝ տեղեկացնելով, որ հետագայ հարուածներ պիտի չշարունակէ։
Ի պատասխան՝ ԱՄՆ վարչակազմը յայտարարած է, որ չի նախատեսեր պատասխանել իրանեան յարձակման եւ պատրաստ է վերսկսելու բանակցութիւնները Իրանի հետ։
Axios-ի հաղորդմամբ՝ այս զարգացումէն ետք շարունակուած են բանակցութիւնները ԱՄՆ-ի եւ Իսրայէլի, ինչպէս նաեւ Քաթարի եւ Իրանի միջեւ՝ հրադադարի պայմաններու եւ ատոր մեկնարկի ժամկէտի շուրջ համաձայնութեան գալու համար։
Սպիտակ Տան պաշտօնեայի խօսքով, որու անունը չի նշուիր, յունիս 23-ի երեկոյեան, երբ յստակ դարձած է, որ իրանցիները աւարտած են իրենց գործողութիւնները, նախագահ Թրամփ հեռաձայնած է Իսրայէլի վարչապետ Բենիամին Նաթանիահուին եւ ըսած, որ կ՛ուզէ, որ պատերազմը աւարտի։
Նոյն պաշտօնեան աւելցուցած է, որ Նաթանիահուն համաձայնած է հրադադարին եւ ընդգծած, որ Իսրայէլ այլեւս հարուածներ պիտի չհասցնէ, քանի դեռ Իրանը դադրեցուցած է իր հրթիռային յարձակումը։
Թրամփ զրուցած է Քաթարի էմիր Թամիմ ալ-Թանիի հետ, իսկ ԱՄՆ փոխնախագահ Վենսը զրուցած է Քաթարի վարչապետ Մոհամմետ պըն Ապտ ալ-Ռահման ալ-Թանիի հետ, որ ուղերձը փոխանցած է Իրանին եւ վերջնականապէս հաստատած հրադադարի պայմանները, ներառեալ՝ անոր մեկնարկի ժամկէտը։
Երբ ամէն բան համաձայնեցուած էր, Թրամփ հրադադարին մասին յայտարարած է Truth Social-ի մէջ իր գրառմամբ։
