5.09c
Երեվան
ուրբ, նմբ 22
22 Սեպտեմբերին, AMAA-ի նախաձեռնութեամբ, Գեղարքունիքի մարզի Գեղամասար խոշորացուած համայնքի Սոթք եւ յարակից երկու գիւղերու 80 բնակիչ վայելեց դասական, ժողովրդական եւ յայտնի էսթրատային երգերու հրաշալի համերգ մը՝ Ալ. Սպենդիարեանի անուան օփերայի եւ պալետի ազգային-ակադեմական թատրոնի մեներգիչներ Վարսենիկ Աւանեանի (մեցցօ սոփրանօ), Սիւզի Մելքոնեանի (սոփրանօ), Արմէն Պատալեանի (թենոր) եւ երգչուհի Նարէ Այվազեանի (սոփրանօ) անզուգական կատարումներով: Համերգին կը մասնակցէր նաեւ օփերային թատրոնի կոնսերտմայսթըր Վասիլի Ռոլիչը: Միջոցառումը կը վարէր AMAA-ի մամուլի քարտուղար Անդրանիկ Մարտոյեանը, որ նոյնպէս հանդիսատեսին նուիրեց իր գեղեցիկ կատարումները՝ բոլորին կողմէ սիրուած երգերու շարքէն:
Ներկաներու շարքին էր նաեւ Կուտական գիւղի վարչական ղեկավար Մակիչ Թովմասեանը, որ մեծ տպաւորութեամբ հեռացաւ համերգէն՝ յայտնելով իր գոհունակութիւնն ու շնորհակալութիւնը AMAA-ին: Նման համերգի այս տարածաշրջանի բնակիչները առաջին անգամ կը մասնակցէին: Կոմիտասի, Առնօ Պապաճանեանի, համաշխարհային դասականներու եւ հայազգի ու օտարերկրեայ այլ մեծութիւններու գործերը անբացատրելի մթնոլորտ ստեղծած էին համայնքին մէջ. մարդիկ կարծես վերգտած ըլլային վեհ ու հոգեղէն արժէք մը՝ սէրը գեղեցիկի նկատմամբ։
