36.09c
Երեվան
չրք, հլս 23
Սփիւռքահայ գրող, հրապարակախօս Կիրակոս Գույումճեանը (Քուէյթ) յուլիս 21-ին Երեւանի մէջ ընթերցողներու դատին յանձնեց «Յուշագրական պատառիկներ» գիրքը։
«Արմէնփրէս»-ի հաղորդմամբ՝ շնորհանդէսին տեսաշարի միջոցով լուսանկարներ ցուցադրուած են գիրքէն, որոնք կը ներկայացնէին Կիրակոս Գույումճեանի ստեղծագործական ու բարեգործական գործունէութիւնը սփիւռքի, Հայաստանի եւ Լեռնային Ղարաբաղի մէջ։
Արձակագիր Պերճուհի Աւետեանը ներկայացուցած է գիրքը՝ արժեւորելով այն ոչ միայն որպէս յուշագրութիւն, այլեւ սփիւռքահայ գրողի անդրադարձ համահայկական հարցերուն: Անի Թորանեանն ընթերցած է «Հայուն թուքը» պատումը Կիրակոս Գույումճեանի գիրքէն: Բանաստեղծ Տիգրան Գաբոյեանը խօսած է Կիրակոս Գույումճեանի գրական, հասարակական ու բարեգործական գործունէութեան մասին:
Հայաստանի գրողներու միութեան նախագահ Էտուարտ Միլիտոնեանն իր ելոյթին մէջ անդրադարձած է Գույումճեանի ստեղծագործական գործունէութեան, անոր՝ նախապէս տպագրուած գիրքերուն, ինչպէս նաեւ «Յուշագրական պատառիկներ»-ուն՝ գնահատելով հեղինակը՝ որպէս սփիւռքահայ գրող եւ հրապարակախօս:
Տեսաերիզի միջոցով իրենց սրտի խօսքն ըսած են Մեծի Տանն Կիլիկիոյ կաթողիկոսութեան Հայագիտական կեդրոնի տեսուչ, հրապարակագիր Ահարոն Շխրտըմեանը (Պէյրութ) «Ազդակ» օրաթերթի խմբագիր, հրապարակագիր Շահան Գանտահարեանը (Պէյրութ), «Գանձասար» օրաթերթի խմբագիր Զարմիկ Պօղիկեանը (Հալէպ):
Երաժշտական կատարումներով հանդէս եկած են Սոֆի Ստեփանեանն ու Արամ Խաչատուրեանը:
Ելոյթ ունեցած է նաեւ «Ժամանակ» օրաթերթի խմբագիր Արա Գօչունեանը: Ելոյթ ունեցողները մեծապէս գնահատած են Կիրակոս Գույումճեանի գրական, հասարակական ու բարեգործական գործունէութիւնը: Կիրակոս Գույումճեանը շնորհակալութիւն յայտնած է իր գիրքի, ինչպէս նաեւ գործունէութեան գնահատանքի մասին հնչած ելոյթներու համար: Այնուհետեւ տեղի ունեցած է գիրքի գինեձօնի արարողութիւն եւ հեղինակն իր գիրքերէն նուիրած է ներկաներուն:
