19.09c
Երեվան
երկ, ապր 27
Սպիտակ տան թղթակիցներու ընկերակցութեան ընթրիքի ժամանակ հիւրանոցին մէջ հնչած կրակոցներէն ետք ձերբակալուած մարդը իրաւապահ մարմիններու կողմէ նոյնականացուած է որպէս Քոուլ Թոմաս Ալըն։
Ինչպէս կը հաղորդէ «Արմէնփրէս»-ը, 31-ամեայ կասկածեալը Քալիֆորնիոյ Լոս Անճելըսի շրջանի Թորանս քաղաքէն է։
Ամերիկեան CBS-ի հաղորդմամբ՝ «Ուաշինկթըն Հիլթըն» հիւրանոցին մէջ ապահովութեան աշխատակիցներու կողմէ ձերբակալուելէ ետք ան իրաւապահ մարմիններուն ըսած է, որ մտադիր եղած է կրակ բանալ ԱՄՆ նախագահ Տանըլտ Թրամփի վարչակազմի անդամներուն վրայ։
NBC-ին տուած հարցազրոյցին ԱՄՆ գլխաւոր դատախազի պաշտօնակատար Թոտ Պլանշը յայտարարած է, որ կասկածեալի գործողութիւններու դրդապատճառները տակաւին կը քննուին, սակայն նախնական տեղեկութիւնները ցոյց կու տան, որ անոր թիրախը եղած են վարչակազմի պաշտօնեաները, «հաւանաբար, անոնց շարքին՝ նախագահ Տանըլտ Թրամփը»։
Պլանշը նաեւ նշած է, որ քննիչները կը հետաքննեն այն տեղեկութիւնն այն մասին, որ կասկածեալը կրնար զէնքը հաւաքած ըլլալ հիւրանոցին մէջ։
ԱՄՆ նախագահ Տանըլտ Թրամփը ընկերային ցանցի մէջ հրապարակած է լուսանկար մը, ուր պատկերուած է գետին ինկած կասկածեալը՝ ձեռքերը շղթայուած մէջքին ետեւը, իսկ անոր շուրջ կանգնած են Գաղտնի ծառայութեան աշխատակիցները։ Թրամփը Fox News-ին ըսած է, որ կասկածեալը «մեծ ատելութիւն ունեցած է իր սրտին մէջ»՝ աւելցնելով, որ անոր ընտանիքը գիտէր, թէ ան «դժուարութիւններ» ունի։ ԱՄՆ նախագահը նաեւ ենթադրած է, որ ձերբակալուածը «խիստ հակաքրիստոնեայ» է։
Հետաքննութիւնը կը շարունակուի՝ յարձակման դրդապատճառը պարզելու համար։
Յիշեցնենք, որ մարդուն արձակած կրակոցէն վիրաւորուած էր գաղտնի ծառայութեան մէկ գործակալ, որ ողջ մնացած է իր զրահաբաճկոնին շնորհիւ։
