36.09c
Երեվան
հնգ, օգս 07
Ռուսիա եւ Ամերիկայի Միացեալ Նահանգները համաձայնութեան հասած են մօտակայ օրերուն նախագահներ Վլատիմիր Փութինի եւ Տանըլտ Թրամփի միջեւ հանդիպում կազմակերպելու հարցով։ Գագաթնաժողովի շուրջ ներկայիս աշխատանքներ կը տարուին, լրագրողներուն հաղորդած է Ռուսիոյ նախագահի օգնական Եուրի Ուշաքովը։ Փութինի եւ Թրամփի հանդիպման վայրը եւս արդէն համաձայնեցուած է ու պիտի յայտարարուի աւելի ուշ։
«Ամերիկեան կողմի առաջարկով՝ սկզբունքային համաձայնութիւն գոյացած է մօտ օրերուն ամենաբարձր մակարդակով երկկողմ հանդիպում մը կազմակերպելու՝ այսինքն՝ նախագահ Վլատիմիր Փութինի եւ Տանըլտ Թրամփի միջեւ հանդիպում։ Այժմ մեր ամերիկացի գործընկերներուն հետ կը սկսինք գործնական աշխատանք»,– աւելցուցած է Ուշաքովը։
Ան նաեւ ընդգծած է, որ Թրամփի յատուկ բանագնաց Սթիւըն Ուիթքոֆ Քրեմլի մէջ բարձրացուցած է Փութինի, Թրամփի եւ Ուքրանիոյ նախագահ Վլատիմիր Զելենսքիի միջեւ եռակողմ հանդիպումի գաղափարը, սակայն Մոսկուան զայն թողած է առանց մեկնաբանութեան։
